યુનાઇટેડ સ્ટેટ્સમાં વિઝા, ગ્રીન કાર્ડ કે વર્ક પરમિટ મેળવવાની પ્રક્રિયા અત્યંત જટિલ, લાંબી અને કાગળકામથી ભરેલી હોય છે. આ જ જટિલતાનો ફાયદો ઉઠાવીને કેટલાક ઠગ અને ફ્રોડ કંપનીઓ અરજદારોને નિશાન બનાવી રહી છે. આ ગંભીર બાબતને ધ્યાનમાં રાખીને, યુએસ સિટીઝનશિપ એન્ડ ઇમિગ્રેશન સર્વિસીસ (USCIS) દ્વારા એક કડક ચેતવણી જારી કરવામાં આવી છે. એજન્સીએ સ્પષ્ટ કર્યું છે કે જે કંપનીઓ કે વેબસાઇટ્સ ફી લઈને ઝડપથી વિઝા કે ગ્રીન કાર્ડ અપાવવાની ગેરંટી આપે છે, તેઓ સંપૂર્ણપણે છેતરપિંડી કરનારા હોઈ શકે છે.

છેતરપિંડીથી બચો

છેતરપિંડી કરનારાઓ સામાન્ય રીતે પોતાને મોટા ઇમિગ્રેશન નિષ્ણાતો તરીકે રજૂ કરે છે અથવા સરકાર સાથે ખાસ સંબંધો હોવાનો ખોટો દાવો કરે છે. તેઓ અરજદારોની મજબૂરીનો લાભ લઈને તેમની પાસેથી મોટી રકમ વસૂલે છે અને વહેલી તકે વિઝા અપાવવાનું વચન આપે છે. USCIS એ સ્પષ્ટ શબ્દોમાં જણાવ્યું છે કે અરજદારોએ આવા કોઈપણ ભ્રામક દાવાઓ અને વચનોના ચક્કરમાં ન આવવું જોઈએ.

USCIS દ્વારા અપાઇ ચેતવણી

ખાસ કરીને ધ્યાનમાં રાખવા લાયક બાબત એ છે કે USCIS માં કોઈપણ પ્રકારના ફોર્મ ભરવા કે અરજી કરવા માટે ફરજિયાતપણે કોઈ મધ્યસ્થી કે પ્રતિનિધિની જરૂર નથી પડતી. લોકો પોતાની અરજી જાતે જ ફાઇલ કરી શકે છે. જો કોઈને ખરેખર કાનૂની સહાયની જરૂર હોય, તો માત્ર યુએસમાં કાયદાકીય પ્રેક્ટિસ કરવા માટે અધિકૃત વકીલો અથવા યુએસ ડિપાર્ટમેન્ટ ઓફ જસ્ટિસ દ્વારા માન્યતા પ્રાપ્ત સંસ્થાઓના પ્રતિનિધિઓ જ કાયદેસર રીતે મદદ કરી શકે છે.

ધ્યાન રાખી અને સતર્ક બનીને આપો ફાઇલ

કોઈપણ વ્યક્તિ કે વેબસાઇટ પોતાને "ઇમિગ્રેશન એક્સપર્ટ" કહે માત્રથી તે કાયદેસર રીતે તમારું પ્રતિનિધિત્વ કરવા માટે અધિકૃત નથી બની જતી. USCIS એ તમામ અરજદારોને વિનંતી કરી છે કે તેઓ આવી છેતરપિંડીથી સાવધ રહે અને હંમેશા સત્તાવાર માધ્યમોનો જ ઉપયોગ કરે.

આ પણ વાંચોઃ ચીન કેમ ભારત પાસે અચાનક માંગવા લાગ્યા આ વસ્તુઓ? જાણો કેમ એકદમ બાજી પલટાઇ