15 જૂનના રોજ અમેરિકાના કેલિફોર્નિયામાં એક હૃદયદ્રાવક સૈન્ય વિમાન દુર્ઘટના સર્જાઈ છે. લોસ એન્જલસથી લગભગ ૯૫ કિલોમીટર ઉત્તરે આવેલા એડવર્ડ્સ એરફોર્સ બેઝ પર યુએસ એરફોર્સનું અત્યંત શક્તિશાળી ગણાતું B-52 બોમ્બર વિમાન ટેકઓફ થયાની ગણતરીની મિનિટોમાં જ ક્રેશ થઈ ગયું હતું. આ દુર્ઘટનામાં વિમાનમાં સવાર તમામ ૮ સૈન્ય જવાનોના કરુણ મોત નિપજ્યા છે.
ટેકઓફ કર્યાના થોડીક મિનિટ બાદ બની ઘટના
એરફોર્સ બેઝના અધિકારીઓ દ્વારા આપવામાં આવેલી માહિતી મુજબ, આ વિમાન સવારે 11.20 વાગ્યે તેના નિયમિત પરીક્ષણ મિશન માટે રવાના થયું હતું. ટેકઓફ કર્યાના થોડા જ સમયમાં વિમાન નિયંત્રણ ગુમાવી બેઠું હતું અને નીચે પછડાયું હતું. અકસ્માત બાદ સમગ્ર વિસ્તારમાં આગના ગોટેગોટા જોવા મળ્યા હતા. ઘટનાસ્થળના એરિયલ ફૂટેજમાં સ્પષ્ટ દેખાય છે કે વિમાન સંપૂર્ણપણે નષ્ટ થઈ ગયું છે, માત્ર રાખ અને કાટમાળ જ બાકી રહ્યા છે. આ ઘટનાને પગલે એડવર્ડ્સ એરફોર્સ બેઝને તાત્કાલિક અસરથી બંધ કરી દેવામાં આવ્યું છે અને આવનારા તમામ વિમાનોને અન્ય સ્થળોએ ડાયવર્ટ કરવામાં આવ્યા છે. હાલમાં આ સમગ્ર મામલે ઉચ્ચ સ્તરીય તપાસના આદેશ આપવામાં આવ્યા છે.
