Washington Firing: કોમ્પ્યુટર સાયન્સમાં માસ્ટર ડિગ્રી, એન્જીનીયર,વિડીયો ગેમ ડેવલોપર કેવી રીતે બન્યો શૂટર?

વોશિંગ્ટનની હિલ્ટન હોટલમાં વ્હાઇટ હાઉસ કોરેસ્પોન્ડન્ટ્સ ડિનર દરમિયાન થયેલા ગોળીબારના મામલે ચોંકાવનારી વિગતો સામે આવી છે. સુરક્ષા એજન્સીઓએ પકડેલા શૂટરની ઓળખ 31 વર્ષીય કોલ થોમસ એલન તરીકે થઈ છે. જેની પ્રોફાઈલ જોઈને તપાસકર્તાઓ પણ આશ્ચર્યમાં મુકાઈ ગયા છે.

ઉચ્ચ શૈક્ષણિક બેકગ્રાઉન્ડ

કોલ થોમસ એલન અત્યંત શિક્ષિત છે. તેણે 2017માં વિશ્વપ્રસિદ્ધ 'કેલિફોર્નિયા ઇન્સ્ટિટ્યૂટ ઓફ ટેકનોલોજી' (Caltech) માંથી મિકેનિકલ એન્જિનિયરિંગમાં ગ્રેજ્યુએશન કર્યું હતું. એટલું જ નહીં, ગયા વર્ષે જ તેણે 'કેલિફોર્નિયા સ્ટેટ યુનિવર્સિટી'માંથી કોમ્પ્યુટર સાયન્સમાં માસ્ટર ડિગ્રી પણ મેળવી હતી.

વ્યવસાયે શિક્ષક અને ગેમ ડેવલપર

તપાસમાં બહાર આવ્યું છે કે એલન લોસ એન્જલસના ટૉરેન્સ વિસ્તારનો રહેવાસી છે અને તે વીડિયો ગેમ ડેવલપર હોવાની સાથે એક ખાનગી ટ્યુશન કંપની 'C2 એજ્યુકેશન'માં પાર્ટ-ટાઈમ શિક્ષક તરીકે કામ કરતો હતો. નવાઈની વાત એ છે કે, ડિસેમ્બર 2024માં જ તેને 'ટીચર ઓફ ધ મંથ'નો એવોર્ડ પણ આપવામાં આવ્યો હતો.

રાજકીય જોડાણ અને કબૂલાત

રેકોર્ડ મુજબ, એલને ઓક્ટોબર 2024માં કમલા હેરિસના રાષ્ટ્રપતિ અભિયાન માટે 25 ડોલરનું દાન પણ આપ્યું હતું. ધરપકડ બાદ એલને અધિકારીઓ સમક્ષ કબૂલાત કરી છે કે તેનો ઈરાદો ટ્રમ્પના અધિકારીઓને નિશાન બનાવવાનો હતો. રાષ્ટ્રપતિ ટ્રમ્પે આ ઘટના બાદ પ્રેસ કોન્ફરન્સમાં શંકાસ્પદ વ્યક્તિ માનસિક રીતે બીમાર હોવાની આશંકા વ્યક્ત કરી હતી. હાલમાં આરોપી પોલીસ કસ્ટડીમાં છે અને સોમવારે તેને કોર્ટમાં રજૂ કરવામાં આવશે.

આ પણ વાંચો: Chernobyl: ઇતિહાસની સૌથી મોટી પરમાણુ દુર્ઘટના,હિરોશિમા-નાગાસાકી કરતા પણ અનેક ગણી