અમેરિકી રાષ્ટ્રપતિ ડોનાલ્ડ ટ્રમ્પ આગામી 24 જુલાઈના રોજ યોજાનારા પ્રતિષ્ઠિત 'વ્હાઇટ હાઉસ કોરેસ્પોન્ડન્ટ્સ એસોસિએશન' (WHCA) ડિનરમાં હાજરી આપશે. અગાઉ 25 એપ્રિલે યોજાનારો આ વાર્ષિક કાર્યક્રમ એક ભયાનક ગોળીબારની ઘટનાને કારણે સ્થગિત કરવો પડ્યો હતો. ડોનાલ્ડ ટ્રમ્પે પોતે પોતાના સોશિયલ મીડિયા પ્લેટફોર્મ 'ટ્રુથ સોશિયલ' પર આ અંગેની માહિતી શેર કરી છે. તેમણે જણાવ્યું કે તેમને આ કાર્યક્રમમાં ભાષણ આપવા માટે આમંત્રિત કરવામાં આવ્યા છે અને તેમણે આ આમંત્રણનો સ્વીકાર કર્યો છે.
25 એપ્રિલે શું બન્યું હતું?
ગયા એપ્રિલ મહિનામાં વોશિંગ્ટનમાં આ ડિનરનું આયોજન ચાલી રહ્યું હતું, ત્યારે એક હુમલાખોર સુરક્ષા કોર્ડન તોડીને સિક્યોરિટી પોસ્ટ સુધી પહોંચી ગયો હતો અને તેણે શૉટગનથી અંધાધૂંધ ફાયરિંગ શરૂ કરી દીધું હતું. તે સમયે રાષ્ટ્રપતિ ટ્રમ્પ પણ ત્યાં હાજર હતા. જોકે, સુરક્ષા એજન્સીઓએ ત્વરિત એક્શન લઈને ટ્રમ્પ અને તેમના પત્ની મેલાનિયા ટ્રમ્પને સુરક્ષિત સ્થાને ખસેડ્યા હતા. આ હુમલા બાદ ઈવેન્ટને અધવચ્ચે જ રોકી દેવામાં આવી હતી.
