- હુમલાઓમાં અત્યાર સુધીમાં 5000થી વધુ પેલેસ્ટાઈનના મોત થયા
- હમાસને ખતમ કરવાની પ્રતિજ્ઞા લેનાર ઈઝરાયેલની સેના ગાઝા પટ્ટીને ચારે બાજુથી ઘેરી
- ઇઝરાયેલી સૈન્ય હજી જમીન આક્રમણ શરૂ કરવા માટે તૈયાર નથી
હમાસ અને ઈઝરાયેલ વચ્ચેના યુદ્ધનો આજે 18મો દિવસ છે. ઈઝરાયેલની વાયુસેના ગાઝા પટ્ટીમાં હમાસના ઠેકાણાઓ પર સતત હવાઈ હુમલા કરી રહી છે. આ હુમલાઓમાં અત્યાર સુધીમાં 5000થી વધુ પેલેસ્ટાઈનના મોત થયા છે. હમાસને ખતમ કરવાની પ્રતિજ્ઞા લેનાર ઈઝરાયેલની સેના ગાઝા પટ્ટીને ચારે બાજુથી ઘેરી રહી છે અને ગ્રાઉન્ડ એટેક માટે ગ્રીન સિગ્નલની રાહ જોઈ રહી છે. આ બધાની વચ્ચે અમેરિકાએ ગાઝામાં ગ્રાઉન્ડ ઓપરેશનમાં ઈઝરાયેલી સેનાની મદદ કરવા માટે મરીન કમાન્ડર અને અન્ય અધિકારીઓને ઈઝરાયેલ મોકલ્યા છે. આ મરીન કમાન્ડરે ઈરાકમાં ISIS સામેના યુદ્ધમાં મહત્વની ભૂમિકા ભજવી છે.
અહેવાલો અનુસાર, થ્રી સ્ટાર મરીન કમાન્ડર લેફ્ટનન્ટ જનરલ જેમ્સ ગ્લિનને ઈઝરાયેલ મોકલવામાં આવ્યા છે. જેમ્સ ગ્લિને ઈરાકમાં ISIS વિરુદ્ધ યુદ્ધમાં સ્પેશિયલ ઓપરેશન ફોર્સની આગેવાની કરી છે. ગ્લિન હાલમાં મરીન કોર્પ્સ (મેનપાવર અને રિઝર્વ અફેર્સ)ના ડેપ્યુટી કમાન્ડન્ટ તરીકે પોસ્ટેડ છે. અમેરિકન અધિકારીઓને ટાંકતા અહેવાલોમાં કહેવામાં આવ્યું છે કે આ અધિકારીઓ ઈઝરાયેલને જમીની હુમલા કેવી રીતે કરવા તે અંગે સૂચના આપશે નહીં પરંતુ હમાસ વિરુદ્ધ યુદ્ધમાં લશ્કરી સલાહ આપશે.
ગાઝામાં હમાસને ખતમ કરશે ઈઝરાયેલ
બાઈડેન વહીવટીતંત્રના વરિષ્ઠ અધિકારીઓએ જણાવ્યું હતું કે ઇઝરાયેલી સૈન્ય હજી જમીન આક્રમણ શરૂ કરવા માટે તૈયાર નથી. અમેરિકાને ચિંતા છે કે ઇઝરાયેલ પાસે ગાઝામાં હમાસને ખતમ કરવા માટે સ્પષ્ટ લશ્કરી યોજનાનો અભાવ છે. અને તેની પાસે કાર્યક્ષમ યોજના નથી. એસોસિએટેડ પ્રેસના જણાવ્યા અનુસાર, ગ્લિન ઇઝરાયલને યુદ્ધમાં નાગરિકોની જાનહાનિ કેવી રીતે ઓછી કરવી તે અંગે પણ સલાહ આપશે.
ઈઝરાયેલે જોરદાર બોમ્બમારો કર્યો
ઈઝરાયેલે સોમવારે રાત્રે ગાઝા પટ્ટીમાં જોરદાર બોમ્બમારો કર્યો હતો. ઈઝરાયેલની સેનાના જણાવ્યા અનુસાર વાયુસેનાએ ગાઝા પટ્ટીમાં હમાસની 400 જગ્યાઓને નિશાન બનાવી હતી. આ હુમલામાં હમાસના ઘણા કમાન્ડરો પણ માર્યા ગયા છે. ઈઝરાયેલના જણાવ્યા અનુસાર હુમલામાં હમાસની અલફુરકાન બટાલિયનના ડેપ્યુટી કમાન્ડર નુસીરત, શાતી અને નાયબ કમાન્ડર માર્યા ગયા છે.
ઈઝરાયેલના ચીફ ઓફ સ્ટાફ લેફ્ટનન્ટ જનરલ હરજી હલેવીએ સ્પષ્ટ કર્યું કે ગાઝા પટ્ટીમાં તેમના હવાઈ હુમલાઓ બંધ નહીં થાય. એટલું જ નહીં, તેમણે એમ પણ કહ્યું હતું કે ઈઝરાયેલની સેના જમીની હુમલા માટે પણ સારી રીતે તૈયાર છે. ઈઝરાયેલની સેના ગાઝા પટ્ટીની આસપાસ કેમ્પ કરી રહી છે.
ફ્રાંસના રાષ્ટ્રપતિ ઈઝરાયેલ પહોંચ્યા
અમેરિકી રાષ્ટ્રપતિ બાઈડેન અને બ્રિટિશ પીએમ ઋષિ સુનાક બાદ હવે ફ્રાન્સના રાષ્ટ્રપતિ ઈમેન્યુઅલ મેક્રોન ઈઝરાયેલ પ્રત્યે પોતાનું સંપૂર્ણ સમર્થન બતાવવા તેલ અવીવ પહોંચ્યા છે. તો બીજી તરફ અમેરિકી રાષ્ટ્રપતિ જો બાઈડેને સ્પષ્ટ કર્યું હતું કે જ્યાં સુધી હમાસ બંધકોને મુક્ત ન કરે ત્યાં સુધી તેઓ યુદ્ધવિરામને સમર્થન આપી શકે નહીં. બાઈડેને કહ્યું હતું કે, હમાસે પહેલા બંધકોને મુક્ત કરવા જોઈએ. આ પછી તેઓ યુદ્ધવિરામ પર વાત કરશે. પહેલા બંધકોને મુક્ત કરવામાં આવે ત્યાર બાદ આગળ વાત કરીશું.
7 ઓક્ટોબરથી યુદ્ધ ચાલુ
7 ઓક્ટોબરે હમાસે ઇઝરાયેલ પર હજારો રોકેટ છોડ્યા હતા. એટલું જ નહીં હમાસના લડવૈયાઓએ ઈઝરાયેલમાં ઘૂસીને નરસંહાર સર્જ્યો હતો. આ હુમલાઓમાં 1400 લોકોના મોત થયા છે. તે જ સમયે, અત્યાર સુધી 220 ઇઝરાયેલ અને વિદેશી નાગરિકો હમાસની કસ્ટડીમાં છે. હમાસના આ હુમલાઓના જવાબમાં ઇઝરાયેલ બોમ્બમારો ચાલુ રાખે છે. આ હુમલાઓના જવાબમાં ગાઝા પટ્ટીમાંથી હમાસ અને લેબનોનથી હિઝબુલ્લાહ ઈઝરાયેલ પર રોકેટ ફાયર કરી રહ્યા છે. ઈઝરાયેલના હુમલામાં પેલેસ્ટાઈનમાં અત્યાર સુધીમાં 5100થી વધુ લોકો માર્યા ગયા છે. જ્યારે 15000થી વધુ લોકો ઘાયલ થયા છે.
