જ્હાન્વીના મોત પર અમેરિકાના સિએટલ શહેરના મેયરે માંગી માફી,કહ્યું- બિલકુલ સ્વીકાર્ય નથી

• અમેરિકામાં પોલીસની કારની ટક્કરથી ભારતીય વિદ્યાર્થીનું મોત
  
• અમેરિકાના સિએટલ શહેરના મેયર બ્રુસ હેરેલે વિદ્યાર્થીના દુઃખદ મૃત્યુ બદલ માફી માંગી
• જ્હાન્વીને ન્યાય આપો,હત્યારા પોલીસકર્મીને જેલમાં ધકેલી દેવો જોઈએ:લોકોનો વિરોધ

અમેરિકામાં પોલીસની કારની ટક્કરથી ભારતીય વિદ્યાર્થીની જ્હાન્વી કંડુલાના મોતનો મામલો જોર પકડી રહ્યો છે. વધી રહેલા વિવાદને જોઈને અમેરિકાના સિએટલ શહેરના મેયર બ્રુસ હેરેલે વિદ્યાર્થીના દુઃખદ મૃત્યુ બદલ માફી માંગી છે. નોંધનીય છે કે આ ઘટના 23 જાન્યુઆરીએ બની હતી જ્યારે સાઉથ લેક યુનિયનમાં નોર્થઈસ્ટર્ન યુનિવર્સિટીની 23 વર્ષીય વિદ્યાર્થિની જ્હાન્વી કંડુલા ડેક્સટર એવેન્યુ નોર્થ અને થોમસ સ્ટ્રીટ નજીક ચાલી રહી હતી ત્યારે તેને સિએટલ પોલીસના વાહને ટક્કર મારી હતી જેમાં તેનું મોત થયું હતું.

અહેવાલ અનુસાર, મેયર હેરેલે શનિવારે માફી માંગી છે. મેયરની માફી સિએટલ વિસ્તારના સાઉથ એશિયન ઈમિગ્રન્ટ સમુદાયના લોકોના જોરદાર પ્રદર્શન બાદ આવી છે. માફીની સાથે જ મેયરે સંપૂર્ણ જવાબદારી સ્વીકારી અને કહ્યું હતું કે આ બિલકુલ સ્વીકાર્ય નથી. માનવ જીવનનું સન્માન કરવું જોઈએ. મીડિયા રિપોર્ટ્સ અનુસાર, મેયર સાથે વિરોધીઓની બેઠક લગભગ દોઢ કલાક સુધી ચાલી હતી જે દરમિયાન મેયરે ખાતરી આપી હતી કે ગુનેગારોને બક્ષવામાં આવશે નહીં. સમુદાયના નેતાઓના જણાવ્યા મુજબ, મેયર હેરેલે ધ્યાનપૂર્વક સાંભળ્યું અને સમગ્ર ચર્ચા દરમિયાન સહાનુભૂતિ દર્શાવી હતી.

જ્હાન્વી કંડુલાને લઈને વિરોધ

નોંધનીય છે કે પોલીસની કારે વિદ્યાર્થીને ટક્કર મારી હતી તે સ્થળે દક્ષિણ એશિયાઈ સમુદાયના 100થી વધુ સભ્યોએ રેલી કાઢી હતી જેમાં ભારતીય વિદ્યાર્થી જ્હાન્વી કંડુલાની હત્યા માટે જવાબદાર પોલીસ અધિકારીઓ માટે સંવેદનશીલતા, સન્માન અને જેલની માંગણી કરવામાં આવી હતી. પ્રદર્શન દરમિયાન, દક્ષિણ એશિયાઈ સમુદાયના હાથમાં પોસ્ટર હતા જેમાં લખ્યું હતું કે 'જ્હાન્વી સિએટલ પોલીસ વિભાગ કરતાં વધુ મહત્વપૂર્ણ છે' અને જ્હાન્વીને ન્યાય મળવો જોઈએ. હત્યારા પોલીસકર્મીને જેલમાં ધકેલી દેવો જોઈએ.

મામલો ફરી કેવી રીતે વધ્યો?

હકીકતમાં આ અકસ્માતનો બોડી કેમેરા ફૂટેજ સામે આવ્યો છે. આ ફૂટેજમાં વિદ્યાર્થીને માર્યા બાદ પોલીસ ઓફિસર ફોન પર હસતો અને મજાક કરતો જોવા મળે છે. આગળ પોલીસ અધિકારીને એમ કહેતા સાંભળી શકાય છે કે 'તે બહુ મૂલ્યવાન ન હતો'. 'શી ઈઝ ડેડ'ના આ ફૂટેજ વાઈરલ થયા બાદ મામલો ફરી એકવાર જોર પકડ્યો છે.