- વિદેશી શરણાર્થીઓ દેશ ન છોડે તો જેલવાસ સુધીની જોગવાઈ
- કાયદાકીય ઔપચારિકતાઓ પૂર્ણ થતાં મોકલાશે સ્વદેશ પરત
- ગેરકાયદેસર રહેવાસીઓને પરત મોકલવાની યોજનાને અંતિમ સ્વરૂપ
પાકિસ્તાને દેશમાં ગેરકાયદેસર રીતે રહેતા વિદેશી નાગરિકો સામે કાર્યવાહી હાથ ધરી છે. આ અવૈધ વસાહતીઓની દેશ છોડવાની સમયમર્યાદા પૂર્ણ થઈ ગઈ છે. પાકિસ્તાન સરકારે ગેરકાયદેસર વસાહતીઓને 1 નવેમ્બર સુધીમાં દેશ છોડી દેવાનો આદેશ જાહેર કર્યો હતો. પાકિસ્તાનમાં મોટી સંખ્યામાં અફઘાન નાગરિકો રહે છે. આ વસાહતીઓની સંખ્યા લગભગ 17 લાખ છે.
દેશ છોડવા અપાયું અલ્ટીમેટમ
ગત મહિને શાહબાઝ શરીફના રાજીનામા પછી રચાયેલી રખેવાળ સરકારે તમામ બિનદસ્તાવેજીકૃત ઇમિગ્રન્ટ્સને 31 ઓક્ટોબર સુધીમાં પાકિસ્તાન છોડી દેવાનું અલ્ટીમેટમ આપ્યું હતું. એવી જાહેરાત કરવામાં આવી હતી કે જે ગેરકાયદેસર વિદેશીઓ 1 નવેમ્બર સુધીમાં દેશ છોડશે નહીં તેમની સામે જેલ અને દેશનિકાલની કાર્યવાહી કરવામાં આવશે. પોલીસે કરાચી, રાવલપિંડી, ઈસ્લામાબાદ, પેશાવર, ક્વેટા અને અન્ય શહેરો સહિત પાકિસ્તાનના વિવિધ ભાગોમાં દસ્તાવેજો વિના રહેતા અનેક લોકોની ધરપકડ પણ કરી છે.
અફઘાન વસાહતીઓની અટકાયત
કરાચીમાં સત્તાવાળાઓએ સદર વિસ્તારમાંથી ચાર ગેરકાયદેસર અફઘાન વસાહતીઓની અટકાયત કરી હતી અને તેમને હોલ્ડિંગ સેન્ટરમાં મોકલ્યા હતાં. જ્યાંથી કાનૂની ઔપચારિકતાઓ પૂર્ણ કર્યા પછી તેમને અફઘાનિસ્તાન પાછા મોકલવામાં આવશે. બલૂચિસ્તાનના ચમન વિસ્તારમાં અલગ-અલગ જગ્યાએથી ડઝનબંધ ઇમિગ્રન્ટ્સને અટકાયતમાં લેવામાં આવ્યા છે.
અફઘાન શરણાર્થીઓ સાથે શું કરશે પાકિસ્તાન?
અધિકારીઓએ જણાવ્યું હતું કે પાકિસ્તાન છોડવાની સમયમર્યાદા જાહેર થયા બાદ મોટી સંખ્યામાં અફઘાન શરણાર્થીઓ ચમન પહોંચ્યા હતાં. તેમણે કહ્યું હતું કે નોંધણી પછી બિનદસ્તાવેજીકૃત અફઘાન પરિવારોને હોલ્ડિંગ સેન્ટરોમાં સ્થાનાંતરિત કરવામાં આવી રહ્યા છે. અધિકારીઓએ જણાવ્યું હતું કે અત્યાર સુધીમાં લગભગ 5000 ગેરકાયદે અફઘાન શરણાર્થીઓને હોલ્ડિંગ સેન્ટરમાં ટ્રાન્સફર કરવામાં આવ્યા છે. પેશાવરમાં એસએસપી ઓપરેશન્સ કાશિફ આફતાબ અબ્બાસીએ બિનદસ્તાવેજીકૃત વિદેશીઓને તેમના દેશમાં પાછા ફરવાની સલાહ આપી હતી.
1 લાખથી પણ વધુ શરણાર્થીઓ અફઘાનિસ્તાન પરત ફર્યા
અફઘાન કમિશનરેટના સૂત્રોના જણાવ્યા અનુસાર પાકિસ્તાનમાં ગેરકાયદેસર રીતે રહેતા લગભગ 104,000 અફઘાન શરણાર્થીઓ અત્યાર સુધીમાં અફઘાનિસ્તાન પરત ફર્યા છે. જેમાં 28 હજાર પુરૂષો, 19 હજાર મહિલાઓ અને 56 હજાર બાળકોનો સમાવેશ થાય છે. ઘણા ગેરકાયદેસર વસાહતીઓની અટકાયત કરવામાં આવી હતી
બિનદસ્તાવેજીકૃત વિદેશીઓને રખાશે હોલ્ડિંગ સેન્ટરમાં
પાકિસ્તાનનાં પંજાબ પ્રાંતનાં IG ઉસ્માન અનવરે જણાવ્યું હતું કે ''ગેરકાયદેસર રહેવાસીઓને પરત મોકલવાની યોજનાને અંતિમ સ્વરૂપ આપવામાં આવ્યું છે અને પ્રાંતીય પોલીસ સંઘીય સરકારની સૂચનાઓનો અમલ કરશે.'' તેમણે કહ્યું હતું કે ''અટકાયતમાં લેવાયેલા બિનદસ્તાવેજીકૃત વિદેશીઓને હોલ્ડિંગ સેન્ટરમાં રાખવામાં આવશે અને કાનૂની ઔપચારિકતાઓ પૂર્ણ કર્યા પછી પ્રાંતમાંથી હાંકી કાઢવામાં આવશે.'' તેમણે વધુમાં જણાવ્યું હતું કે ''શરણાર્થીઓને પરિવહન, ભોજન અને અન્ય વ્યવસ્થા પૂરી પાડવાની જવાબદારી જિલ્લા વહીવટીતંત્રની રહેશે.''
પાકિસ્તાનના વિદેશ મંત્રીએ શું કહ્યું?
પાકિસ્તાનના વિદેશ મંત્રી જલીલ અબ્બાસ જિલાનીએ સ્પષ્ટતા કરી હતી કે ''માત્ર એવા અફઘાન શરણાર્થીઓને જ દેશનિકાલ કરવામાં આવી રહ્યા છે જેઓ કાનૂની દસ્તાવેજો વિના પાકિસ્તાનમાં રહે છે.'' તેમણે કહ્યું હતું કે ''અફઘાન શરણાર્થીઓની ઘણી શ્રેણીઓ છે અને માત્ર બિનદસ્તાવેજીકૃત ઈમિગ્રન્ટ્સને જ સન્માનપૂર્વક પાકિસ્તાન છોડવાનું કહેવામાં આવ્યું હતું.'' વિદેશ મંત્રીએ એમ પણ કહ્યું કે ''સત્તાવાળાઓ તે અફઘાન શરણાર્થીઓ પ્રત્યે ઉદારતા દાખવશે જેઓ તેમના દેશમાં પાછા ફર્યા પછી સમસ્યાઓનો સામનો કરી શકે છે.'' તેમણે કહ્યું હતું કે ''વચગાળાની અફઘાન સરકારે શરણાર્થીઓના પુનર્વસન માટે એક કમિશનની પણ રચના કરી છે.'' જિલાનીએ કહ્યું કે ''પાકિસ્તાનની સાથે અન્ય દેશો પણ વચગાળાની અફઘાન સરકારને પરત ફરેલા લોકોના પુનર્વસન માટે સમર્થન કરશે.''
પાકિસ્તાનમાં 40 લાખ અફઘાન નાગરિકો રહે છે
સત્તાવાર અંદાજ મુજબ પાકિસ્તાનમાં 40 લાખથી વધુ અફઘાન વસવાટ કરે છે. જેમાંથી લગભગ 1.7 મિલિયન ગેરકાયદે અને ગેરકાયદેસર રીતે રહે છે. આ વસાહતીઓ કથિત રીતે ઉગ્રવાદ અને વિવિધ ગુનાઓમાં સંડોવાયેલા છે. પાકિસ્તાનમાંથી ગેરકાયદેસર રીતે રહેતા લોકોને બહાર કાઢવાનો નિર્ણય આ વર્ષે આતંકવાદમાં વધારો થયા બાદ લેવામાં આવ્યો હતો જેમાં 14 આત્મઘાતી હુમલાનો સમાવેશ થાય છે. તેમાં અફઘાન નાગરિકો સામેલ હોવાનું જાણવા મળ્યું હતું. પાકિસ્તાનના આ પગલાની ઘણા આંતરરાષ્ટ્રીય જૂથો તેમજ તાલિબાનની આગેવાની હેઠળની અફઘાન સરકાર દ્વારા ટીકા કરવામાં આવી છે.
