રશિયાના રાષ્ટ્રપતિ ઓક્ટોબરમાં ચીનની કરશે મુલાકાતે, અનેક મુદ્દાઓ પર બનાવશે નવી રણનીતિ

• ચીનના રાષ્ટ્રપતિ શી જિનપિંગને પુતિને આપ્યુ આમંત્રણ
  
• ઓક્ટોબરમાં ચીનની મુલાકાતે જશે રશિયાના રાષ્ટ્રપતિ
• પુતિન બેઇજિંગ પહોંચીને શી જિનપિંગ સાથે કરશે બેઠક

રશિયાના રાષ્ટ્રપતિ વ્લાદિમીર પુતિન ઓક્ટોબરમાં ચીનની મુલાકાત લેશે. તેણે પોતે આ વાતની પુષ્ટિ કરી છે. પુતિને બુધવારે કહ્યું હતું કે, ઓક્ટોબરમાં ચીનની મુલાકાત લેવા માટે ચીનના રાષ્ટ્રપતિ શી જિનપિંગનું આમંત્રણ સ્વીકાર્યું છે.

રશિયાના રાષ્ટ્રપતિ વ્લાદિમીર પુતિન ચીનની મુલાકાતે જવાના છે. ચીનની મુલાકાતને લઇ વિશ્વભરમાં અનેક ચર્ચાઓ ચાલી રહી છે. તેવામાં રશિયાના સરકારી ટેલિવિઝન પર એક બેઠક દરમિયાન પુતિને બેઇજિંગના વિદેશ પ્રધાન વાંગ યીને જણાવ્યું હતું કે, "હું પીપલ્સ રિપબ્લિક ઓફ ચાઇનાના રાષ્ટ્રપતિના ઓક્ટોબરમાં ચીનની મુલાકાત લેવાનું આમંત્રણ સ્વીકારીને ખુશ છું." બેઇજિંગ પહોંચીને પુતિન તેમના ચીની સમકક્ષ શી જિનપિંગને મળશે. ઇન્ટરનેશનલ ક્રિમિનલ કોર્ટે યુક્રેનમાંથી બાળકોને ગેરકાયદેસર રીતે દેશનિકાલ કરવા માટે ધરપકડ વોરંટ જારી કર્યા બાદ પુતિનની આ પ્રથમ વિદેશ યાત્રા હશે.

ચીનના વિદેશ મંત્રી રશિયાના પ્રવાસે છે

ઉલ્લેખનીય છે કે, ચીનના ટોચના રાજદ્વારી અને વિદેશ મંત્રી વાંગ યી રશિયાની મુલાકાતે ગયા છે. વાંગ યી ચાર દિવસની મુલાકાતે રશિયા ગયા છે. જ્યાં તેઓ વાર્ષિક વ્યૂહાત્મક સુરક્ષા પરામર્શ બેઠકોમાં ભાગ લઈ રહ્યા છે. આવી સ્થિતિમાં પુતિને વાંગ યી સાથેની મુલાકાત દરમિયાન તેમની ચીન મુલાકાતની પુષ્ટિ કરી હતી. તમને જણાવી દઈએ કે ચીનના રાષ્ટ્રપતિ જિનપિંગે ગત માર્ચ મહિનામાં પુતિનને મોસ્કોની મુલાકાત દરમિયાન આમંત્રણ આપ્યું હતું. તેમના આમંત્રણ પર રશિયન રાષ્ટ્રપતિ ત્રીજા બેલ્ટ એન્ડ રોડ ફોરમમાં ભાગ લેશે.

ધરપકડના ડરથી પુતિન વિદેશ પ્રવાસ ટાળી રહ્યા છે

અગાઉ પુતિન વિદેશ પ્રવાસ ટાળતા હતા. તેમણે તાજેતરમાં યોજાયેલી BRICS સમિટ અને G-20 સમિટમાં ભાગ લીધો ન હતો. એવો દાવો કરવામાં આવી રહ્યો હતો કે પુતિન વિરુદ્ધ ઇન્ટરનેશનલ ક્રિમિનલ કોર્ટ (ICC) દ્વારા ધરપકડ વોરંટ જારી કરવામાં આવ્યા બાદ તેઓ વિદેશ પ્રવાસ ટાળી રહ્યા હતા.