- નિજ્જરની હત્યાને લઈને ભારત અને કેનેડા વચ્ચે તણાવ વધ્યો
- અમે કેનેડિયન સાથીદારો સાથે ગાઢ સંપર્કમાં છીએ: અમેરિકા
- કેનેડાએ આ સમગ્ર મામલામાં તેની તપાસ આગળ વધારવી જોઈએ
શીખ અલગતાવાદી નેતા હરદીપ સિંહ નિજ્જરની હત્યાને લઈને ભારત અને કેનેડા વચ્ચે તણાવ વધી ગયો છે. સંબંધો પણ નિર્ણાયક તબક્કે આવી ગયા છે. બંને દેશો વચ્ચેનો આ વિવાદ ક્યારે ઉકેલાશે તેની હાલ કોઈ ખાતરી નથી. વિશ્વના અન્ય દેશોની પણ નજર ભારત-કેનેડા પર છે. અમેરિકા આ મામલાને સતત ફોલો કરી રહ્યું છે અને આ દરમિયાન તેમણે એક મોટું નિવેદન આપ્યું છે.
કેનેડાએ તેની તપાસ આગળ વધારવી જોઈએ: અમેરિકા
અમેરિકી વિદેશ વિભાગના પ્રવક્તા મેથ્યુ મિલરે કહ્યું હતું કે, અમે વડાપ્રધાન ટ્રુડો દ્વારા લગાવવામાં આવેલા આરોપોથી ચિંતિત છીએ. અમે કેનેડિયન સાથીદારો સાથે ગાઢ સંપર્કમાં છીએ. અમે માનીએ છીએ કે કેનેડાએ આ સમગ્ર મામલામાં તેની તપાસ આગળ વધારવી જોઈએ અને ગુનેગારોને ન્યાયના સકંજામાં લાવવા જોઈએ. અમે સાર્વજનિક અને ખાનગી રીતે ભારત સરકારને કેનેડિયન તપાસમાં સહકાર આપવા વિનંતી કરી છે.
ભારત સામેના આરોપોથી અમેરિકા ચિંતિતઃ બ્લિંકન
અમેરિકાના વિદેશ મંત્રી એન્ટની બ્લિંકને આ મામલે કહ્યું હતું કે કેનેડાના વડાપ્રધાન ટ્રુડો દ્વારા ભારત પર લગાવવામાં આવેલા આરોપોને લઈને અમેરિકા ખૂબ જ ચિંતિત છે અને વોશિંગ્ટન આ મુદ્દે ઓટ્ટાવા સાથે નજીકથી સંકલન કરી રહ્યું છે. અમેરિકા આ મામલે જવાબદારી જોવા માંગે છે. શુક્રવારે ન્યૂયોર્કમાં એક પ્રેસ કોન્ફરન્સમાં બોલતા બ્લિંકને કહ્યું હતું કે અમેરિકાએ આ મુદ્દે ભારત સરકાર સાથે સીધી વાત કરી છે અને સૌથી ઉપયોગી બાબત આ તપાસ પૂર્ણ કરવાની રહેશે.
તમને જણાવી દઈએ કે ગયા અઠવાડિયે કેનેડાના વડાપ્રધાન જસ્ટિન ટ્રુડોએ નિજ્જર હત્યાકાંડ માટે ભારતને જવાબદાર ગણાવ્યું હતું. તેમણે આરોપ લગાવ્યો હતો કે નિજ્જરની હત્યામાં ભારતનો હાથ છે. જોકે, ભારતે પીએમ ટ્રુડોના નિવેદનને સંપૂર્ણપણે ફગાવી દીધું હતું.
