પાકિસ્તાનના પૂર્વ PM ઈમરાન ખાનને ખતરો, સૈન્યએ જીવતા રહેવા આવા વિકલ્પો આપ્યા

• પૂર્વ પીએમ ઈમરાન ખાનની મુશ્કેલીઓમાં સતત વધારો
  
• હવે ઈમરાન ખાનના જીવને પણ ખતરો
• તોશા ખાના સહિતના કેસમાં ઈમરાનને લાંબી સજાનો આદેશ

પાકિસ્તાનના પૂર્વ પીએમ ઈમરાન ખાનને જેલમાં ધકેલી દેવામાં આવ્યા છે. પરંતુ તેમની મુસીબતો માત્ર આટલેથી જ ખતમ થવાની નથી. ઈમરાન ખાનનો જીવ જોખમમાં છે. ઈમરાન ખાનના નજીકના ડૉ.સલમાન અહેમદે આ દાવો કર્યો છે. ઇમરાન ખાન પહેલાં સત્તા ગુમાવી હતી. ત્યારબાદ તેમને જેલમાં ધકેલી દેવામાં આવ્યા હતા અને હવે 8મી ફેબ્રુઆરીએ યોજાનારી ચૂંટણી માટે તેમનું નામાંકન પણ રદ કરવામાં આવ્યું છે. પાકિસ્તાની સેના ઇમરાનને સંપૂર્ણપણે ગાયબ કરવા માંગે છે. હવે ઈમરાન ખાનને જીવિત રહેવા માટે પાકિસ્તાની સેનાએ ત્રણ વિકલ્પ આપ્યા છે.

મળતી માહિતી અનુસાર, સેના દ્વારા આપવામાં આવેલ પહેલો વિકલ્પ એ છે કે ઈમરાન પાકિસ્તાનની જનતાની ઔપચારિક રીતે માફી માંગે અને રાજકારણથી દૂર રહે. તેમને તેમના પરિવારના સભ્યોને નોમિનેટ કરીને ચૂંટણીના રાજકારણનો ભાગ બનવાનો વિકલ્પ આપવામાં આવ્યો છે. ઈમરાનનો બીજો વિકલ્પ બની ગાલામાં રહેવાનો અને તેની પાર્ટી પાકિસ્તાન તહરીક-એ-ઈન્સાન (પીટીઆઈ)ની ચૂંટણીમાં ભાગ ન લેવાનો છે. ખાને પાર્ટીનું ચૂંટણી ચિન્હ ક્રિકેટ બેટ ગુમાવ્યાના અઠવાડિયા પછી 1 ફેબ્રુઆરીના રોજ આંતર-પાર્ટી ચૂંટણીની જાહેરાત કરી હતી.

સેના ઈમરાનથી ડરે છે

ઈમરાન ખાનની પત્ની બુશરા બીબીને તેમની સાથે ભ્રષ્ટાચારના કેસમાં સજા ફટકારવામાં આવી છે. ઈમરાન ખાનને ત્રીજો વિકલ્પ આપવામાં આવ્યો છે કે તેઓ ત્રણમાંથી કોઈપણ એક ઉમેદવારને વડાપ્રધાન પદ માટે નોમિનેટ કરે અને નામ જાહેર કરે. સલમાન અહેમદના કહેવા પ્રમાણે, ઈમરાને કોઈપણ ઓફર સ્વીકારવાનો ઈન્કાર કરી દીધો છે. તેણે ઈમરાનને એક લોકપ્રિય નેતા ગણાવ્યો, જેને પાકિસ્તાનના 95 ટકા લોકો પસંદ કરે છે અને સેના ઈમરાનથી ડરે છે. તેમણે કહ્યું કે ઈમરાન ખાન ઝૂકશે નહીં અને સત્ય માટે ઊભા રહેશે.

ઈમરાન જેલમાં જ રહેશે

પાકિસ્તાનની એક કોર્ટે તોશાખાના કેસમાં ઈમરાન ખાન અને તેની પત્ની બુશરા બીબીને 14 વર્ષની જેલની સજા સંભળાવી છે. આ સિવાય દંપતીને 10 વર્ષ સુધી કોઈ પણ જાહેર પદ સંભાળવા પર રોક લગાવવામાં આવી છે. તેના પર 78.7 કરોડ પાકિસ્તાની રૂપિયાનો દંડ ફટકારવામાં આવ્યો છે. આ પહેલા પાકિસ્તાનની વિશેષ અદાલતે ઈમરાન ખાન અને પૂર્વ વિદેશ મંત્રી શાહ મહમૂદ કુરેશીને સ્ટેટ સિક્રેટના ઉલ્લંઘનના આરોપમાં 10 વર્ષની જેલની સજા સંભળાવી હતી.