- સરકાર તમામ શનિવારે બેંકોમાં રજા અંગે નિર્ણય લઈ શકે
- બેંક કર્મચારીઓના પગારમાં 15 થી 20 ટકાનો વધારો થઇ શકે
- દેશના 8.50 લાખ કર્મચારીઓ પગાર વધારાની રાહ જોઈ રહ્યા છે
જાહેર ક્ષેત્રની બેંકોમાં કામ કરતા કર્મચારીઓને આવનારા દિવસોમાં સારા સમાચાર મળવાના છે. કેન્દ્ર સરકાર તમામ શનિવારે બેંકોમાં રજા જાહેર કરવા અંગે નિર્ણય લઈ શકે છે. દેશની જાહેર ક્ષેત્રની બેંકોની વ્યવસ્થાપન સંસ્થા ઇન્ડિયન બેંક એસોસિએશન પહેલાથી જ સરકારને તમામ શનિવારને બેંકોમાં રજા તરીકે જાહેર કરવા માટેનો પ્રસ્તાવ રજૂ કરી ચૂકી છે. સંસદના શિયાળુ સત્ર દરમિયાન રાજ્યસભામાં પૂછવામાં આવેલા પ્રશ્નના જવાબમાં ખુદ સરકારે આ માહિતી આપી છે.
5 દિવસના કામકાજના સપ્તાહ માટે પ્રસ્તાવ મળ્યો
રાજ્યસભાના સાંસદ સુમિત્રા બાલ્મીકે નાણામંત્રીને પૂછ્યું કે શું જાહેર ક્ષેત્રની બેંકોમાં પાંચ દિવસ કામ કરવાની માંગને લઈને બેંક યુનિયનો અથવા આઈબીએ દ્વારા સરકારને કોઈ પ્રસ્તાવ રજૂ કરવામાં આવ્યો છે? અને શું સરકાર તેનો અમલ કરશે? આ પ્રશ્નના જવાબમાં નાણા રાજ્ય મંત્રી ભગવત કરાડે ગૃહમાં તેમના લેખિત જવાબમાં જણાવ્યું હતું કે, હા, ઈન્ડિયન બેંક્સ એસોસિએશને તમામ શનિવારે બેંકોમાં રજા જાહેર કરવા સરકારને પ્રસ્તાવ રજૂ કર્યો છે. નાણા રાજ્ય મંત્રીએ તેમના જવાબમાં જણાવ્યું નથી કે સરકારે આ અંગે શું નિર્ણય લીધો છે. નાણા રાજ્ય મંત્રીએ ચોક્કસપણે કહ્યું કે IBA અને બેંક યુનિયનો વચ્ચે 28 ઓગસ્ટ 2015ના રોજ થયેલા કરાર હેઠળ દર મહિનાના બીજા અને ચોથા શનિવારે બેંકોમાં રજા જાહેર કરવાનો નિર્ણય લેવામાં આવ્યો હતો.
પગાર વધારા સાથે શનિવારે રજાની ભેટ
જોકે, એવું માનવામાં આવે છે કે ડિસેમ્બર 2023ના બીજા કે ત્રીજા સપ્તાહમાં સરકાર સરકારી બેંક કર્મચારીઓના પગારમાં 15 થી 20 ટકાના વધારાની સાથે બેંકોમાં 5 દિવસ કામ કરવાના નિર્ણયને મંજૂરી આપી શકે છે. ત્યારબાદ મહિનાના તમામ શનિવારે બેંકોમાં રજા રહેશે. વેતન વધારા અંગે 12મી દ્વિપક્ષીય સમાધાન અંગે બેંક યુનિયનો અને IBA વચ્ચે ચાલી રહેલી વાટાઘાટો તેના અંતિમ તબક્કામાં છે. પગાર વધારાની સાથે બેંકોમાં 5 દિવસ કામ કરવાની અને શનિવારે રજાની જાહેરાત એક સાથે થઈ શકે છે.
8.50 લાખ કર્મચારીઓ પગાર વધારાની રાહ જોઈ રહ્યા છે
સરકારી બેંક કર્મચારીઓનો વર્તમાન પગાર કરાર 1 નવેમ્બર, 2022 ના રોજ સમાપ્ત થઈ ગયો છે. અને તેના કારણે પગાર વધારા અંગે સર્વસંમતિ સાધવા માટે યુનિયનો અને IBA વચ્ચે વાતચીત ચાલી રહી છે. દેશમાં 8.50 લાખથી વધુ બેંક કર્મચારીઓ પગાર વધારાના સારા સમાચારની રાહ જોઈ રહ્યા છે અને સરકાર લોકસભાની ચૂંટણી પહેલા કોઈપણ ભોગે પગાર વધારા અંગે નિર્ણય લેવા માંગે છે.
