GSTના દર ઘટાડવાની તૈયારીમાં સરકાર, જલ્દી જ લેવાશે નિર્ણય

નાણાપ્રધાન નિર્મલા સીતારમણે GSTને લઈને મોટું નિવેદન આપ્યું છે, જેનાથી ઘણા લોકોને મોટી રાહત થશે. શનિવારે નાણાપ્રધાને કહ્યું હતું કે જીએસટી દરોમાં વધુ ઘટાડો કરવામાં આવશે. તેમણે કહ્યું કે કરના દરો અને સ્લેબને તર્કસંગત બનાવવાનું કામ લગભગ અંતિમ તબક્કામાં પહોંચી ગયું છે. તેમણે કહ્યું કે 1 જુલાઈ, 2017ના રોજ GST લાગુ થયા સમયે રેવન્યુ ન્યુટ્રલ રેટ (RNR) 15.8 ટકાથી ઘટાડીને 2023માં 11.4 ટકા કરવામાં આવ્યો છે. મંત્રીએ કહ્યું, "તેમાં હજુ ઘટાડો થશે."

સ્લેબમાં ફેરફારો સૂચવવા માટે મંત્રીઓના જૂથની રચના કરી

નિર્મલા સીતારમણ અને તેમના રાજ્ય સમકક્ષોની આગેવાની હેઠળની GST કાઉન્સિલે સપ્ટેમ્બર 2021માં દરોને તર્કસંગત બનાવવા અને સ્લેબમાં ફેરફારો સૂચવવા માટે મંત્રીઓના જૂથ (GoM)ની રચના કરી હતી. એક પ્રશ્નના જવાબમાં નાણાપ્રધાન સીતારમણે કહ્યું કે "જીએસટીના દરો અને સ્લેબને તર્કસંગત બનાવવાનું કામ લગભગ અંતિમ તબક્કામાં પહોંચી ગયું છે."

મંત્રીઓનું જૂથ સમીક્ષા કર્યા પછી નિર્ણય લેશે

નાણાપ્રધાને કહ્યું, “મંત્રીઓના જૂથે ખૂબ સારું કામ કર્યું છે, પરંતુ હવે આ તબક્કે મેં ફરી એકવાર દરેક જૂથના કાર્યની સંપૂર્ણ સમીક્ષા કરવાની પહેલ કરી છે અને પછી કદાચ હું તેને કાઉન્સિલ સમક્ષ લઈ જઈશ. પછી વિચારણા કરવામાં આવશે કે આપણે આ અંગે અંતિમ નિષ્કર્ષ પર પહોંચી શકીએ છીએ કે નહીં. સીતારમણે કહ્યું કે દરોને તર્કસંગત બનાવવા માટે હજુ થોડું કામ કરવાની જરૂર છે. તેમણે કહ્યું, “અમે તેને આગામી કાઉન્સિલ (મીટિંગ) માં લઈ જઈશું. અમે દર ઘટાડા, તર્કસંગતકરણ, સ્લેબની સંખ્યાને ધ્યાનમાં લેવા વગેરે જેવા કેટલાક ખૂબ જ મહત્વપૂર્ણ મુદ્દાઓ પર અંતિમ નિર્ણય લેવાની ખૂબ નજીક છીએ.

શેરબજાર પર કહી મોટી વાત

શેરબજારમાં અસ્થિરતા વિશે પૂછવામાં આવતા, નાણાપ્રધાન સીતારમણે કહ્યું, "આ વિશે પૂછવું એ તેના જેવું છે કે શું દુનિયા શાંતિપૂર્ણ રહેશે, શું યુદ્ધો સમાપ્ત થશે, શું લાલ સમુદ્ર સુરક્ષિત રહેશે, શું કોઈ ચાંચિયાઓ નહીં હોય." શું હું આના પર ટિપ્પણી કરી શકું છું અથવા તમારામાંથી કોઈ ટિપ્પણી કરી શકે છે?" તેમણે કહ્યું કે સરકાર જાહેર ક્ષેત્રની બેન્કોમાં છૂટક રોકાણકારોનો હિસ્સો વધારવા માટે પ્રતિબદ્ધ છે.