Union Budget 2024: નેચરલ ફાર્મિંગથી લઈને ડિજિટલ સર્વે,જાણો ખેડૂતો માટેની મોટી જાહેરાતો

• 32 પાકોની 109 જાતો લાવવામાં આવશે
  
• 10 હજાર બાયો રિસર્ચ સેન્ટર બનાવવામાં આવશે
• કુદરતી ખેતી માટે એક કરોડ ખેડૂતોને મદદ અપાશે

કેન્દ્રીય નાણામંત્રી નિર્મલા સીતારમણે નાણાકીય વર્ષ 2024-25 માટે સામાન્ય બજેટ રજૂ કર્યું છે. આ બજેટમાં જનતાને અનેક ભેટો આપવામાં આવી છે. બજેટમાં આરોગ્ય, શિક્ષણ, કૃષિ અને ઈન્ફ્રાસ્ટ્રક્ચર પર ભાર મૂકવામાં આવ્યો છે. જો આપણે કૃષિ ક્ષેત્રની વાત કરીએ તો સરકાર દ્વારા કૃષિ સંશોધનની સ્થાપના કરવામાં આવશે અને તેના માટે ભંડોળ પૂરું પાડવામાં આવશે.

10 હજાર બાયો રિસર્ચ સેન્ટર બનાવવામાં આવશે

નાણામંત્રીએ કહ્યું કે કુદરતી ખેતીનું પ્રમાણપત્ર કરવામાં આવશે. 10 હજાર બાયો રિસર્ચ સેન્ટર બનાવવામાં આવશે. તેમણે કહ્યું કે કુદરતી ખેતી માટે એક કરોડ ખેડૂતોને મદદ આપવામાં આવશે. તેમજ તેનો અમલ ગ્રામ પંચાયતો દ્વારા કરવામાં આવશે. આ ઉપરાંત મંત્રીએ કહ્યું કે 32 પાકોની 109 જાતો લાવવામાં આવશે. તેની પર સરકારનું ફોકસ રહેશે. શાકભાજીની સપ્લાય ચેઇન પર ભાર મૂકવામાં આવશે. કેન્દ્રીય નાણામંત્રી નિર્મલા સીતારમણે કહ્યું કે 400 જિલ્લામાં પાકનો ડિજિટલ સર્વે કરવામાં આવશે.

આ બજેટમાં ખેડૂતો પર વિશેષ ધ્યાન આપવામાં આવ્યું હતું. બજેટમાં ખેડૂતોને ઘણી ભેટ મળી છે. જેમાંથી એક સારા સમાચાર પીએમ કિસાન ક્રેડિટ કાર્ડને લઈને પણ આવ્યા છે, નાણામંત્રીએ કહ્યું કે દેશના પાંચ રાજ્યોમાં જન સમર્થ આધારિત કિસાન ક્રેડિટ કાર્ડ જારી કરવામાં આવશે.