કેન્દ્રીય નાણામંત્રી નિર્મલા સીતારમણ રવિવાર, 1 ફેબ્રુઆરીએ બજેટ 2026 રજૂ કરવાની તૈયારીમાં છે. બજેટ ભાષણ પહેલા માત્ર બે દિવસ બાકી હોવાથી આર્થિક અને ઉદ્યોગ જગતમાં ચર્ચાઓ તેજ બની ગઈ છે. ખાસ કરીને રોકાણકારો નાણાકીય વર્ષ 2027 માટે ક્ષેત્રીય ફાળવણી, આવકવેરા નીતિમાં સંભવિત ફેરફારો અને નિકાસ સ્પર્ધાત્મકતા વધારવા માટે લેવાતા પગલાં પર ધ્યાન કેન્દ્રિત કરી રહ્યા છે.
આર્થિક વૃદ્ધિ 6.8%
આર્થિક સર્વે 2026 અનુસાર, નાણાકીય વર્ષ 2027માં ભારતની આર્થિક વૃદ્ધિ 6.8% થી 7.2% વચ્ચે રહેવાની શક્યતા છે, જ્યારે સંભવિત વૃદ્ધિ દર 7% આસપાસ રહેશે. આ આંકડા દેશની મજબૂત આર્થિક સ્થિતિ દર્શાવે છે, પરંતુ વૈશ્વિક અનિશ્ચિતતાઓ વચ્ચે સરકાર માટે સંતુલિત બજેટ રજૂ કરવો મોટો પડકાર રહેશે.
બજેટ દિવસે શેરબજાર ખુલ્લું
ખાસ વાત એ છે કે બજેટ દિવસે શેરબજાર ખુલ્લું રહેશે. NSE અને BSE બંને નિયમિત સમય દરમિયાન કારોબાર કરશે. જોકે આ વર્ષે બજારના સહભાગીઓ બહુ મોટી અપેક્ષાઓ રાખતા નથી. તેઓ મુખ્યત્વે મૂડીલાભ કર (Capital Gains Tax)માં સંભવિત રાહતની આશા રાખે છે અને સરકારને ટ્રાન્ઝેક્શન ટેક્સમાં વધારો ન કરવા વિનંતી કરે છે.
પ્રવાસન ક્ષેત્રની બજેટથી બે મોટી અપેક્ષાઓ
પ્રવાસન ઉદ્યોગ પણ બજેટ 2026 તરફ મોટી આશાઓ સાથે જોઈ રહ્યો છે. નિષ્ણાતોના જણાવ્યા અનુસાર આવનાર બજેટ ભારતના પ્રવાસન ક્ષેત્રને વધુ મજબૂત બનાવવાની એક મોટી તક છે.
પ્રવાસન ઉદ્યોગની મુખ્ય બે માંગણીઓ આ મુજબ છે
- પરોક્ષ કરમાં ઘટાડો – જેના કારણે હોટેલ, પ્રવાસ પેકેજ અને અન્ય સેવાઓ વધુ પોષણક્ષમ બનશે, રોજગાર સર્જન વધશે અને ઉદ્યોગમાં સતત વૃદ્ધિ થશે.
- પ્રવાસન માળખાગત સુવિધાઓ માટે વધુ ફંડ – સ્થાનિક અને આંતરરાષ્ટ્રીય પ્રવાસીઓને આકર્ષવા માટે રસ્તા, એરપોર્ટ, ટુરિસ્ટ ડેસ્ટિનેશન અને સુવિધાઓમાં સુધારાની જરૂર છે.
આ માંગણીઓને ધ્યાનમાં લે તો
જો સરકાર આ માંગણીઓને ધ્યાનમાં લઈ બજેટમાં યોગ્ય પગલાં લે, તો પ્રવાસન ક્ષેત્ર દેશના GDPમાં મહત્વપૂર્ણ યોગદાન આપી શકે છે અને મોટા પાયે રોજગાર સર્જી શકે છે. કુલ મળીને, બજેટ 2026-27 દેશની આર્થિક દિશા નક્કી કરશે. હવે જોવાનું એ રહેશે કે સરકાર વિકાસ, કરરાહત અને ઉદ્યોગ પ્રોત્સાહન વચ્ચે કેટલું સંતુલન સાધે છે.
આ પણ વાંચો : 14 વર્ષ બાદ Pakistan–Bangladesh વચ્ચે ફરી શરૂ થઈ સીધી ફ્લાઇટ સેવા, કરાચી પહોંચતા ભવ્ય સ્વાગત
