ગુજરાતમાં દારૂબંધીના કાયદાના કડક અમલીકરણ વચ્ચે સુરત રેલવે પોલીસ (GRP) દ્વારા એક મોટી કાર્યવાહી કરવામાં આવી છે. લાંબા સમયથી અલગ-અલગ રેડ દરમિયાન જપ્ત કરવામાં આવેલા ગેરકાયદેસર દારૂના જથ્થાનો આજે જાહેર સ્થળે નાશ કરવામાં આવ્યો હતો. રેલવે પોલીસે અંદાજે 18.54 લાખ રૂપિયાની કિંમતની હજારો બોટલો પર બુલડોઝર ફેરવી તેને નષ્ટ કરી દીધી હતી.
14,268 બોટલોનો કરાયો નાશ
સુરત રેલવે પોલીસ સ્ટેશનમાં નોંધાયેલા કુલ 765 જેટલા પ્રોહિબિશનના ગુનાઓમાં આ મુદ્દામાલ જપ્ત કરવામાં આવ્યો હતો. જેમાં દેશી અને વિદેશી દારૂની નાની-મોટી કુલ 14,268 બોટલોનો સમાવેશ થાય છે. આ જપ્ત કરાયેલા મુદ્દામાલની કુલ બજાર કિંમત અંદાજે રૂપિયા 18,54,315 જેટલી આંકવામાં આવી છે. કાયદાકીય પ્રક્રિયા પૂર્ણ થયા બાદ, ઉચ્ચ અધિકારીઓની હાજરીમાં આ તમામ બોટલોને ખુલ્લા મેદાનમાં પાથરી તેના પર રોલર અથવા બુલડોઝર ફેરવી દેવામાં આવ્યું હતું.
