અમદાવાદ શહેરના નરોડા વિસ્તારમાં હથિયારોની હેરાફેરી અને ગેરકાયદેસર વપરાશ સામે પોલીસે લાલ આંખ કરી છે. નરોડા પોલીસ દ્વારા મળેલી ચોક્કસ બાતમીના આધારે ગાયત્રી પાર્ક ત્રણ રસ્તા પાસેથી એક શખ્સને બાર બોરની રાઇફલ અને બનાવટી લાઈસન્સ સાથે ઝડપી લેવામાં આવ્યો હતો. હાલ તેની સામે કાયદેસરની કાર્યવાહી હાથ ધરવામાં આવી છે.
બનાવટી લાયસન્સ સાથે ફરતો હતો આરોપી
નરોડા પોલીસને ચોક્કસ બાતમી મળી હતી કે, એક વ્યક્તિ ગેરકાયદેસર હથિયાર સાથે વિસ્તારમાં ફરી રહ્યો છે. જેના આધારે પોલીસે વોચ ગોઠવી વિક્રમસિંહ ચૌહાણ નામના શખ્સને રોકીને તપાસ કરી હતી. આરોપીની તલાશી લેતા તેની પાસેથી બાર બોરની રાઇફલ અને 5 જીવતા કારતૂસ મળી આવ્યા હતા. આરોપીએ પોલીસને છેતરવા માટે હથિયારનું લાઈસન્સ પણ રજૂ કર્યું હતું, પરંતુ તપાસ દરમિયાન તે લાઈસન્સ બનાવટી હોવાનું બહાર આવ્યું હતું.
