બનાસકાંઠા જિલ્લાના દિયોદર પોલીસ સ્ટેશનમાં પોલીસની કાર્યશૈલી સામે સવાલ ઉઠાવતી એક ચોંકાવનારી ઘટના સામે આવી છે. ન્યાયની આશાએ દિયોદર પોલીસ મથકે આવેલી એક પીડિત મહિલાએ જ્યારે પોલીસ સ્ટેશનના પગથિયાં પાસે જ ઝેરી દવા પી આત્મહત્યાનો પ્રયાસ કરતા સમગ્ર પંથકમાં ખળભળાટ મચી જવા પામ્યો છે.
દિયોદર પોલીસે ફરિયાદ ન લીધી હોવાનો આક્ષેપ
ઘટનાની મળતી માહિતી અનુસાર, રેખાબેન વાલ્મીકિ નામની મહિલા પોતાની કોઈ રજૂઆત અથવા ફરિયાદ માટે દિયોદર પોલીસ સ્ટેશન પહોંચી હતી. જોકે, ત્યાં હાજર પોલીસ કર્મચારીઓએ તેની ફરિયાદ લેવાનો ઇન્કાર કર્યો હોવાનો તેના પરિવારજનો દ્વારા આક્ષેપ કરવામાં આવ્યો છે. વારંવારની રજૂઆત છતાં પોલીસ દ્વારા કોઈ કાર્યવાહી કરવામાં ન આવતા આખરે લાચાર બનેલી રેખાબેને પોલીસ સ્ટેશનના દરવાજા બહાર જ ઝેરી દવા ગટગટાવી જીવન ટૂંકાવવાનો પ્રયાસ કર્યો હતો.
