સોશિયલ મીડિયામાં સસ્તી પ્રસિદ્ધિ મેળવવા અને 'રીલ્સ' બનાવવાના ચક્કરમાં આજકાલ યુવાનો પોતાના અને અન્યના જીવ જોખમમાં મૂકતા અચકાતા નથી. જૂનાગઢના રાજલક્ષ્મી પાર્ક વિસ્તારમાં પૂરઝડપે અને જોખમી રીતે કાર ચલાવી સ્ટંટ કરી રહેલા એક યુવકનો વીડિયો વાયરલ થતા પોલીસે તેની શાન ઠેકાણે લાવી દીધી છે. પોલીસે આ સ્ટંટબાજની અટકાયત કરી તેને કાયદાનું ભાન કરાવ્યું છે.
શું હતો સમગ્ર મામલો?
વાયરલ થયેલા વીડિયોમાં જોઈ શકાય છે કે, યુવક રાજલક્ષ્મી પાર્કના મુખ્ય રોડ પર બેફામ રીતે કાર ચલાવી જોખમી સ્ટંટ કરી રહ્યો હતો. ભરચક રસ્તા પર અન્ય વાહનચાલકો અને રાહદારીઓના જીવ જોખમમાં મૂકીને આ યુવકે સોશિયલ મીડિયા પર ફેમસ થવા માટે આ કરતૂત કરી હતી. વીડિયો સોશિયલ મીડિયામાં વાયરલ થતા જ જૂનાગઢ પોલીસ એક્શનમાં આવી હતી.
