સુરત રેલવે પોલીસ સ્ટેશનના સ્ટાફ દ્વારા બાતમી અને સતર્કતાના આધારે એક પ્રશંસનીય કામગીરી કરવામાં આવી છે. ઉત્તરપ્રદેશથી એક સગીર વયની કિશોરીને લલચાવી-ફોસલાવીને સુરત ભગાડી લાવનારા ઇસમને સુરત રેલવે સ્ટેશન પરિસરમાંથી ઝડપી લેવામાં આવ્યો છે. પોલીસ દ્વારા કિશોરીને હેમખેમ મુક્ત કરાવી કાયદેસરની તપાસ હાથ ધરવામાં આવી છે.
બાતમીના આધારે વોચ ગોઠવી
ઘટનાની મળતી માહિતી અનુસાર, ઉત્તરપ્રદેશ પોલીસ દ્વારા સુરત પોલીસને જાણ કરવામાં આવી હતી કે, એક શખ્સ સગીરાને લઈને ટ્રેન મારફતે સુરત તરફ આવી રહ્યો છે. આ મામલે સુરત રેલવે પોલીસની ટીમ દ્વારા પ્લેટફોર્મ અને સ્ટેશન વિસ્તારમાં વોચ ગોઠવવામાં આવી હતી. આ દરમિયાન, શંકાસ્પદ હાલતમાં જણાતા એક શખ્સને અટકાવી તેની પૂછપરછ કરતા સમગ્ર મામલો સામે આવ્યો હતો.
કિશોરીને મુક્ત કરાવી પરિવારનો સંપર્ક કરાયો
પોલીસ દ્વારા આરોપીની અટકાયત કરી તેની સાથે રહેલી કિશોરીને સુરક્ષિત રીતે મુક્ત કરાવવામાં આવી હતી. પ્રાથમિક પૂછપરછમાં જાણવા મળ્યું છે કે, આરોપી કિશોરીને ઉત્તરપ્રદેશથી લગ્નની લાલચ આપી અથવા અન્ય કોઈ બહાને ભગાડીને સુરત લાવ્યો હતો. સુરત પોલીસ દ્વારા આ અંગે ઉત્તરપ્રદેશ પોલીસ અને કિશોરીના પરિવારજનોને જાણ કરવામાં આવી છે.
આગળની તપાસ
હાલમાં સુરત રેલવે પોલીસ દ્વારા આરોપીનો કબજો મેળવી તેની ધરપકડ કરી લેવામાં આવી છે. સગીરાને હાલ ચાઈલ્ડ વેલ્ફેર કમિટી અથવા સેફ કસ્ટડીમાં સોંપવાની તજવીજ ચાલી રહી છે. ઉત્તરપ્રદેશ પોલીસની ટીમ સુરત પહોંચ્યા બાદ આરોપી અને કિશોરીને ત્યાં લઈ જવામાં આવશે. સુરત રેલવે પોલીસની આ ત્વરિત કામગીરીને કારણે એક સગીરાનું જીવન બરબાદ થતા બચી ગયું છે.
આ પણ વાંચો - Surat: ડિંડોલી પોલીસે વાહન ચેકિંગ દરમિયાન ચોરીની રિક્ષા સાથે આરોપી ઝડપાયો, મુદ્દામાલ જપ્ત
