સુરેન્દ્રનગર જિલ્લાના લીંબડી શહેરમાં તસ્કરોએ પોલીસને પડકાર ફેંકતા રહેણાંક વિસ્તારમાં ચોરીની ઘટનાને અંજામ આપ્યો છે. લીંબડીની જૂની સોસાયટી વિસ્તારમાં આવેલા બે બંધ મકાનોને તસ્કરોએ નિશાન બનાવી લાખોની કિંમતના મુદ્દામાલ પર હાથફેરો કરતા સમગ્ર પંથકમાં ચકચાર મચી જવા પામી છે.
તક જોઈ તસ્કરોએ ખેલ પાડી દીધો
ઘટનાની મળતી માહિતી અનુસાર, લીંબડીની જૂની સોસાયટીમાં આવેલા બે મકાનોના માલિકો બહાર ગયા હોવાથી તસ્કરોએ મોકો જોઈ રાત્રિના સમયે તાળા તોડ્યા હતા. તસ્કરોએ મકાનમાં રાખેલા કબાટના લોકર તોડી તેમાં રહેલા સોના-ચાંદીના દાગીના તેમજ રોકડ રકમની ચોરી કરી હતી. સવારે જ્યારે પડોશીઓએ મકાનના તાળા તૂટેલા જોયા ત્યારે આ ચોરીની ઘટના પ્રકાશમાં આવી હતી.
