Vadodara News: 'સાથે જીવી ન શક્યા તો સાથે મર્યા', સરણેજ કેનાલમાં ઓઢણી બાંધી પ્રેમીપંખીડાએ કરી આત્મહત્યા

વડોદરા જિલ્લાના વાઘોડિયા તાલુકાના સરણેજ ગામ પાસેથી પસાર થતી નર્મદા મેઈન કેનાલમાં આજે એક હૃદયદ્રાવક ઘટના સામે આવી છે. પ્રેમ સંબંધમાં નિષ્ફળતા અથવા અન્ય કોઈ સામાજિક કારણોસર એક પ્રેમી યુગલે એકબીજાને ઓઢણીથી બાંધીને કેનાલમાં મોતની છલાંગ લગાવી જીવન ટૂંકાવી લીધું છે. આ ઘટનાને પગલે સમગ્ર પંથકમાં ચકચાર મચી ગઈ છે.

ઓઢણીથી એકબીજાને બાંધી લગાવી છલાંગ

મળતી વિગત મુજબ, વાઘોડિયાના સરણેજ પાસે નર્મદા મેઈન કેનાલમાં સ્થાનિકોએ બે મૃતદેહ તરતા જોયા હતા, જે અંગે તાત્કાલિક જરોદ પોલીસને જાણ કરવામાં આવી હતી. પોલીસે ઘટનાસ્થળે પહોંચી તપાસ કરતા ચોંકાવનારી વિગત સામે આવી હતી કે યુવક અને યુવતીએ એકબીજાને ઓઢણીના છેડાથી બાંધ્યા હતા, જેથી પાણીના પ્રવાહમાં પણ તેઓ એકબીજાથી અલગ ન થાય.

પોલીસે ઓળખ વિધિ માટે તપાસ તેજ કરી

મૃતક યુવક અને યુવતીની ઉંમર અંદાજે 25 થી 30 વર્ષની હોવાનું અનુમાન છે. જરોદ પોલીસે સ્થાનિક તરવૈયાઓની મદદથી બંને મૃતદેહોને કેનાલમાંથી બહાર કાઢી પોસ્ટમોર્ટમ અર્થે હોસ્પિટલ ખસેડ્યા છે. હાલ આ યુગલ ક્યાંનું છે અને તેમણે આ આત્યંતિક પગલું કેમ ભર્યું તે હજુ જાણી શકાયું નથી. પોલીસે ગુમ થયેલા વ્યક્તિઓની યાદી તપાસીને ઓળખ વિધિની પ્રક્રિયા હાથ ધરી છે.

આ કરૂણ અંજામથી પંથકમાં અરેરાટી વ્યાપી ગઈ છે અને ઘટનાસ્થળે લોકોના ટોળેટોળા ઉમટી પડ્યા હતા.

આ પણ વાંચો - Vadodara: ફૂલબાગ ચોકડી પર કાળ બનીને ધસી આવ્યું ડમ્પર, બાઈક ચાલકનું ઘટનાસ્થળે જ કમકમાટીભર્યું મોત