મહેસાણા જિલ્લાના કડી તાલુકામાંથી કાયદો અને વ્યવસ્થાની સ્થિતિ સામે સવાલ ઉઠાવતો એક ચોંકાવનારો કિસ્સો સામે આવ્યો છે. કડીના મોકાસણ ગામે માત્ર ચોરીની શંકાના આધારે એક 55 વર્ષીય પ્રૌઢને કાયદો હાથમાં લઈને નિર્દયતાથી માર મારી મોતને ઘાટ ઉતારી દેવામાં આવતા સમગ્ર પંથકમાં ચકચાર મચી ગઈ છે. તાલુકામાં ફરી એકવાર કાયદાના ડર વગર તાલિબાની સજા આપીને વ્યક્તિનો જીવ લેવાયો હોવાની આશંકા સેવાઈ રહી છે.
બે દિવસ પહેલા ઇજાગ્રસ્ત હાલતમાં મળ્યા હતા પ્રૌઢ
મળતી વિગતો અનુસાર, મોકાસણ ગામના વતની પ્રતાપજી મોહનજી ઠાકોર નામના વ્યક્તિ બે દિવસ પહેલા ગામમાંથી જ લોહીલુહાણ અને અત્યંત ગંભીર ઇજાગ્રસ્ત હાલતમાં મળી આવ્યા હતા. તેમને તાત્કાલિક હોસ્પિટલ ખસેડવામાં આવ્યા હતા, જ્યાં ગંભીર ઇજાઓના કારણે સારવાર દરમિયાન તેમણે દમ તોડ્યો હતો. પ્રૌઢનું મોત નીપજતાં જ આ મામલો હત્યામાં ફેરવાયો છે.
