ફેમસ મ્યુઝિક ડાયરેક્ટર અને સિંગર ઈસ્માઈલ દરબારના ઘરે ચોરી થઈ છે. ચોર તેના સુરતના ઘરમાંથી રોકડ અને કિંમતી વસ્તુઓ લઈને ભાગી ગયો છે. લગભગ 30 લાખ રૂપિયાની ચોરી થઈ છે. આ પહેલા 4 ફેબ્રુઆરીએ સંગીતકાર પ્રીતમની ઓફિસમાં પણ ચોરીની ઘટના બની હતી.
પ્રીતમની ઓફિસમાં કામ કરતો એક ઓફિસ બોય 40 લાખ રૂપિયા લઈને ફરાર થઈ ગયો હતો. બે દિવસમાં સંગીત ઉદ્યોગના બે દિગ્ગજોના નિવાસસ્થાને ચોરીનો આ બીજો બનાવ છે. ઈસ્માઇલ તેના પરિવાર સાથે મુંબઈમાં રહે છે. પરંતુ તેનું સુરતમાં પણ એક ઘર છે. હાલમાં, તેમની પુત્રી અને જમાઈ સુરતમાં તેમના ઘરે ગયા હતા.
સૂત્ર પાસેથી મળેલી માહિતી મુજબ, તેમની પુત્રી અને જમાઈએ કહ્યું છે કે ઘરમાંથી 30 લાખ રૂપિયાની ચોરી થઈ છે. આ મામલે વધુ માહિતી હજુ બહાર આવવાની બાકી છે.
પ્રીતમની ઓફિસમાંથી બેગ લઈને ભાગ્યો ચોર
પ્રીતમનું ઘર, ઓફિસ અને સ્ટુડિયો પણ આ જ બિલ્ડિંગમાં છે. 4 ફેબ્રુઆરીના રોજ, જ્યારે તે તેના ઘરે હતો, ત્યારે બપોરે 2 વાગ્યાની આસપાસ, આશિષ સયાલ નામનો એક વ્યક્તિ ત્યાં આવ્યો અને કામનું કારણ આપીને 40 લાખ રૂપિયા ભરેલી બેગ લઈ ગયો. પ્રીતમ અને ઈસ્માઇલ દરબાર બંને સંગીત ઉદ્યોગના મોટા નામ છે. બંને લગભગ અઢી દાયકાથી હિન્દી ફિલ્મોમાં કામ કરી રહ્યા છે. બંનેએ ઘણા ગીતો ગાયા અને કમ્પોઝ કર્યા છે.
આ ફિલ્મથી કરી કરિયરની શરુઆત
ઈસ્માઈલ દરબારે 1999માં સંજય લીલા ભણસાલી દ્વારા દિગ્દર્શિત સલમાન ખાન-ઐશ્વર્યા રાય સ્ટારર ફિલ્મ 'હમ દિલ દે ચૂકે સનમ'થી સંગીત દિગ્દર્શક તરીકેની શરૂઆત કરી હતી. પ્રીતમને બોલીવુડમાં પહેલો બ્રેક 2001માં રિલીઝ થયેલી ફિલ્મ 'તેરે લિયે'થી મળ્યો હતો. તેને 2004 માં આવેલી ફિલ્મ 'ધૂમ' માં સંગીત નિર્દેશક તરીકે પણ કામ કર્યું હતું.
