- સલમાન ખાનના ઘરની બહાર ફાયરિંગના મામલામાં નવો ખુલાસો
- પોલીસે જણાવ્યું હતું કે આ કેસનું ષડયંત્ર અમેરિકામાં ઘડાયું
- લોરેન્સ બિશ્નોઈના ભાઈએ ઘટનાની જવાબદારી સ્વીકારીને ચેતવણી આપી
અભિનેતા સલમાન ખાનના ઘરની બહાર ફાયરિંગના મામલામાં મુંબઈ પોલીસે નવો ખુલાસો કર્યો છે. પોલીસે જણાવ્યું હતું કે ફાયરિંગની ઘટનાની જવાબદારી સ્વીકારનાર ફેસબુક પેજનું IP એડ્રેસ કેનેડાનું હોવાનું બહાર આવ્યું છે.
સલમાન ખાનના ઘરની બહાર ગોળીબારના કલાકો પછી ગેંગસ્ટર લોરેન્સ બિશ્નોઈના ભાઈ અનમોલ બિશ્નોઈએ એક કથિત ફેસબુક ઓનલાઈન પોસ્ટમાં આ ઘટનાની જવાબદારી સ્વીકારી અને ચેતવણી આપી કે તે 'ટ્રેલર' હતું. તપાસ એજન્સી સાથે સંકળાયેલા સૂત્રોએ જણાવ્યું કે આ કેસનું ષડયંત્ર અમેરિકામાં ઘડવામાં આવ્યું હતું. આ આયોજન લગભગ એક મહિનાથી ચાલતું હતું.
હકીકતમાં રવિવારે (14 એપ્રિલ 2024) મુંબઈમાં અભિનેતા સલમાન ખાનના ઘરની બહાર બે શૂટરોએ ગોળીબાર કર્યો હતો. ત્યાર બાદ બંને ભાગી ગયા હતા અને પોલીસ તેની શોધ કરી રહી છે. આ દરમિયાન એક વિશાલ રાહુલ ઉર્ફે કાલુ પણ તેમાં સામેલ હોવાનું સામે આવ્યું છે.
કોણ છે વિશાલ રાહુલ ઉર્ફે કાલુ?
પોલીસ ડોઝિયરમાં ખુલાસો થયો છે કે સલમાન ખાનના ઘરની બહાર ફાયરિંગ કરનાર વિશાલ રાહુલ ઉર્ફે કાલુ ગુરુગ્રામનો રહેવાસી છે. કાલુએ 10મા ધોરણ સુધી અભ્યાસ કર્યો છે અને તેની સામે 5થી વધુ ફોજદારી કેસ નોંધાયેલા છે.
એક ન્યૂઝ ચેનલને આપેલા ઈન્ટરવ્યુમાં લોરેન્સ બિશ્નોઈએ સલમાન ખાનને ધમકી આપી હતી અને કહ્યું હતું કે તેણે માફી માંગવી જોઈએ નહીં તો તેણે પરિણામ ભોગવવું પડશે. આ પહેલા પણ સલમાન ખાનને જૂન 2022માં હાથથી લખેલા પત્ર દ્વારા ધમકી આપવામાં આવી હતી.
પોલીસે શું કહ્યું?
બાંદ્રા પોલીસે જણાવ્યું કે ભારતીય દંડ સંહિતાની કલમ 307 (હત્યાનો પ્રયાસ) અને આર્મ્સ એક્ટ હેઠળ અજાણ્યા વ્યક્તિ વિરુદ્ધ કેસમાં એફઆઈઆર નોંધવામાં આવી છે. સવારે લગભગ 5 વાગ્યે બાંદ્રા વિસ્તારમાં ગેલેક્સી એપાર્ટમેન્ટની બહાર બે વ્યક્તિઓએ ચાર ગોળીઓ ચલાવી અને ભાગી ગયા હતા. ત્યાર બાદ ખાનના નિવાસસ્થાનની સુરક્ષા વધારી દેવામાં આવી છે.
