Entertainment: આ મારી છેલ્લી ફિલ્મ.... શું એક્ટિંગમાંથી સંન્યાસ લેશે આ જાણીતી અભિનેત્રી?

ખુબ જ જાણીતી અભિનેત્રી શર્મિલા ટાગોર લાંબા સમયથી બોલીવૂડ ઈન્ડસ્ટ્રીનો ભાગ છે. અભિનેત્રીએ છેલ્લા કેટલાક વર્ષોમાં ખુબ જ ઓછી ફિલ્મોમાં કામ કર્યું છે પણ તે 80 વર્ષની ઉંમરે પણ એક્ટિવ છે. અભિનેત્રીએ તાજેતરમાં એક બંગાળી ફિલ્મમાં અભિનય કર્યો છે. તેમની ફિલ્મ 'પુરાતન' સિનેમાઘરોમાં રિલીઝ થઈ ગઈ છે. ત્યારે હવે અભિનેત્રીએ કરેલી એક વાતને લઈને ફિલ્મ જગતમાં ભારે ખળભળાટ મચી ગયો છે.

કદાચ હવે કોઈ બંગાળી ફિલ્મમાં કામ નહીં કરે!

અભિનેત્રીએ તાજેતરના એક ઈન્ટરવ્યુ દરમિયાન ફિલ્મ વિશે વાત કરી અને ત્યારબાદ કહ્યું કે કદાચ આ ફિલ્મ પછી તે કોઈ બંગાળી ફિલ્મમાં કામ નહીં કરે. તેમણે આનું કારણ પણ આપ્યું છે. જોકે, તેમણે હમણાં જ કામ ન કરવાની ઈચ્છા વ્યક્ત કરી છે અને કદાચ એમ પણ કહ્યું છે. આવી સ્થિતિમાં, શક્ય છે કે તે હિન્દી ફિલ્મો કરે. પદ્મ ભૂષણ પુરસ્કાર વિજેતા અભિનેત્રી શર્મિલા ટાગોરે કહ્યું કે તાજેતરમાં રિલીઝ થયેલી તેમની ફિલ્મ 'પુરાતન' તેમની છેલ્લી બંગાળી ફિલ્મ હોઈ શકે છે.

સ્વાસ્થ્યના કારણોના લીધે કહ્યું કે હવે તેમને લાંબા શૂટિંગમાં ભાગ લેવો થોડો મુશ્કેલ લાગી રહ્યો છે. અભિનેત્રીએ કહ્યું, "ચાલો જોઈએ આગળ શું થાય છે. મને બંગાળી ફિલ્મોમાં કામ કરવું ગમે છે. મને કોલકાતા ખૂબ ગમે છે પણ હવે મારી તબિયત પહેલા જેવી રહેતી નથી. અમે ગંગા કિનારે એક રિસોર્ટમાં 14-15 દિવસ શૂટિંગ કર્યું અને તે એક શાનદાર અનુભવ રહ્યો. તમારી માતૃભાષા બંગાળીમાં ડાયલોગ બોલવાની ભાવનાત્મક અનુભૂતિ અનોખી છે. તમે તરત જ ડાયલોગ સુધારી શકો છો. તમે તમારી લાગણીઓ સરળતાથી વ્યક્ત કરી શકો છો."

ફિલ્મના પાત્ર વિશે જાણો

શર્મિલા ટાગોર 'પુરાતન'માં એક વૃદ્ધ માતાની ભૂમિકા ભજવે છે, જે કોર્પોરેટ જગતમાં કામ કરતી એક આધુનિક વિચારધારા ધરાવતી મહિલા છે. પોતાના પાત્ર વિશે વાત કરતાં શર્મિલા ટાગોરે કહ્યું- આવા પાત્રો હંમેશા મળતા નથી. દરેક ફિલ્મ મારા માટે એક પડકાર છે. હું દરેક પાત્રને એક હેતુ સાથે ભજવવા માગુ છું. ફિલ્મના દિગ્દર્શક સુમન ઘોષે મને દરેક ફ્રેમમાં સુંદર દેખાડવાનો શ્રેષ્ઠ પ્રયાસ કર્યો. તેમણે ખૂબ જ સુંદર વાર્તા બનાવી છે.

શર્મિલા ટાગોરે શમ્મી કપૂરથી લઈને રાજેશ ખન્ના સુધીની ફિલ્મોમાં કામ કર્યું

શર્મિલા ટાગોરની વાત કરીએ તો, તેમણે 1959માં પોતાની કારકિર્દીની શરૂઆત કરી હતી. અભિનેત્રીને ફિલ્મોમાં કામ કર્યાને 66 વર્ષ થઈ ગયા છે. આ સમયગાળા દરમિયાન, તેમણે શમ્મી કપૂરથી લઈને રાજેશ ખન્ના સુધીની ફિલ્મોમાં કામ કર્યું અને પોતાના શાનદાર અભિનયથી ચાહકોને દિવાના બનાવ્યા છે. અભિનેત્રીને તેમના સમયની સૌથી સુંદર અભિનેત્રીઓમાંની એક ગણવામાં આવતી હતી. શર્મિલાએ પોતાની કારકિર્દીમાં આરાધના, અમર પ્રેમ, ઈવનિંગ ઈન પેરિસ, સફર, છોટી બહુ, આવિષ્કાર, ચુપકે ચુપકે અમાનુષ, ફુલ એન્ડ ફાઇનલ, સમંતર અને ગુલમોહર જેવી ફિલ્મોમાં કામ કર્યું હતું.