અમિતાભ બચ્ચનની આઇકોનિક ફિલ્મ 'ડૉન' (Don) ની વાર્તા રસપ્રદ છે. આ ફિલ્મનું નિર્માણ રૂપિયા 70 લાખના નજીવા બજેટમાં થયું હતું. 1978 માં કોઈ પ્રમોશન વગર રિલીઝ થયેલી આ ફિલ્મ તેના પહેલા અઠવાડિયે ફ્લોપ જાહેર થઈ હતી, જે આજના સમયમાં માનવું મુશ્કેલ છે. આ ફિલ્મે પછીથી બોક્સ ઓફિસ પર ઈતિહાસ રચ્યો, જેના કારણે તે ભારતીય સિનેમાની ક્લાસિક ફિલ્મોમાંની એક ગણાય છે. 'ડૉન'માં અમિતાભ બચ્ચને બેવડી ભૂમિકા ભજવી હતી અને તેમાં ઝીનત અમન, પ્રાણ જેવા કલાકારો પણ મુખ્ય ભૂમિકામાં હતા.
એક ગીત અને બદલાયું નસીબ
ફિલ્મના નસીબનો પલટો પોસ્ટ-રિલીઝમાં ઉમેરવામાં આવેલા એક ગીતને આભારી છે. સુપરહિટ ચાર્ટબસ્ટર ગીત 'ખાઈકે પાન બનારસવાલા' (Khaike Paan Banaraswala) ઉમેરાયા પછી, 'ડૉન'ની બોક્સ ઓફિસની ગાથા બદલાઈ ગઈ. આ ગીતે દર્શકોને સિનેમાઘરો તરફ ખેંચ્યા, અને 'વર્ડ ઓફ માઉથ'ના કારણે આ ફિલ્મ ઓલ-ટાઇમ બ્લોકબસ્ટર બની. આ ફિલ્મે આશરે રૂપિયા 7.2 કરોડની કમાણી કરી, જે તે સમયે જંગી રકમ હતી. આ કમાણીએ ફિલ્મ નિર્માતા નરીમન ઈરાનીના પરિવારને તેમનું દેવું ચૂકવવામાં મદદ કરી.
