આજે બોલિવૂડ સુપરસ્ટાર અમિતાભ બચ્ચનનો જન્મદિવસ છે. ઉદ્યોગના બિગ બી આજે તેમનો 83મો જન્મદિવસ ઉજવી રહ્યા છે. હિન્દી ફિલ્મ ઇન્ડસ્ટ્રીમાં અમિતાભ બચ્ચન શહેનશાહ, બિગ બી, અભિનયના ઉસ્તાદ, સદીના મહાનાયક જેવા અનેક નામોથી લોકપ્રિય થયા છે. બચ્ચન ફક્ત એક સરનેમ જ કાફી છે. ફક્ત બચ્ચન કહેતા જ લોકોના મનમાં અમિતાભની તસવીર સામે આવી જાય છે. ઇન્ડસ્ટ્રીમાં 'બિગ બી' એક દાયકો નહીં પરંતુ એક યુગ છે. નવોદિત કલાકારો અમિતાભને અભિનયની પાઠશાળા પણ કહી રહ્યા છે. અમિતાભ બચ્ચન વિશે ઘણું લખી શકાય છે. પરંતુ આજે તેમના સંઘર્ષની વાત કરીએ છીએ. જયાંથી તેમની સફર શરુ થઈ હતી.
કઠિન પરિશ્રમ બાદ સફળતા હાસિલ
અમિતાભ બચ્ચનને કઠિન પરિશ્રમ બાદ સફળતા હાસિલ કરી છે. આજે 'બિગ બી ' જે મુકામ પર છે ત્યાં પહોંચવા જીવનમાં લાંબો સંઘર્ષ કર્યો. અમિતાભ ઇન્ડસ્ટ્રીમાં આવ્યા ત્યારે તેમના કોઈ ગોડ ફાધર નહોતા. તેમની પ્રથમ ફિલ્મ 'સાત હિન્દુસ્તા'ની હતી. આ ફિલ્મ બોક્સઓફિસ પર નિષ્ફળ રહી. છતાં અમિતાભે હાર ના માની અને વધુ ફિલ્મો કરી. બચ્ચનની શરૂઆતની સતત સાત ફિલ્મ નિષ્ફળ રહી. છતાં અમિતાભમાં કંઇક એવું હતું જેના કારણે ફિલ્મો નિષ્ફળ જવા બાદ પણ નિર્માતા તેમને ફિલ્મોમાં લઈ રહ્યા હતા. અને આખરે જયા ભાદુરી સાથેની ફિલ્મ 'ઝંઝીર' આવી અને બચ્ચનનું નસીબ બદલાયું. ઝંઝીર ફિલ્મમાં બચ્ચનના કડક તેવર લોકોને અપીલ કરી ગયો.
