બોલીવુડ એક્ટ્રેસ તનુશ્રી દત્તા હાલ મુશ્કેલ સમયમાંથી પસાર થઈ રહી છે.એક્ટ્રેસે એક વીડિયો શેર કર્યો છે જેમાં તે રડતી જોવા મળી રહી છે. તનુશ્રીએ વીડિયોમાં ખુલાસો કર્યો છે કે 2018માં Me Too દરમિયાન અવાજ ઉઠાવ્યા બાદથી તેને હેરાન કરવામાં આવી રહી છે. કંટાળીને એક્ટ્રેસે પોલીસમાં રિપોર્ટ કરવાની વાત કરી હતી અને મદદ માટે અપીલ કરી છે.
તનુશ્રી દત્તાએ પોતાના ઇન્સ્ટાગ્રામ પર પોતાનો એક વીડિયો શેર કર્યો છે જેમાં એક્ટ્રેસ રડતી જોવા મળી રહી છે. વીડિયોમાં તે કહે છે- મારા પોતાના ઘરમાં મને હેરાન કરવામાં આવી રહી છે. મેં હમણાં જ પોલીસને ફોન કર્યો છે, તેમણે મને પોલીસ સ્ટેશન બોલાવી છે જેથી હું ફરિયાદ નોંધાવી શકું. કદાચ હું કાલે ત્યાં જઈશ કારણ કે મારી તબિયત સારી નથી.
તનુશ્રીએ વીડિયોમાં શું કહ્યુું?
વીડિયોમાં તનુશ્રીએ આગળ કહ્યું- મારી તબિયત બગડી ગઈ છે, છેલ્લા 4-5 વર્ષમાં મને એટલી બધી હેરાન કરવામાં આવી છે કે. હું કોઈ કામ કરી શકતી નથી, મારું આખું ઘર અસ્તવ્યસ્ત છે. હું એક નોકરાણી પણ રાખી શકતી નથી કારણ કે તેઓએ મારા ઘરમાં એક નોકરાણી રાખી હતી અને મને નોકરાણીઓ સાથે ખરાબ અનુભવ થયો છે. તે આવે છે, ચોરી કરે છે અને ચાલ્યા જાય છે. મારે બધું કામ જાતે કરવું પડે છે. હું મારા પોતાના ઘરમાં મુશ્કેલીમાં ફસાઈ ગઈ અને હેરાન થઈ રહી છું. કૃપા કરીને કોઈ મને મદદ કરો.
કોઈ મને મદદ કરો- તનુશ્રી દત્તા
એક્ટ્રેસે વીડિયો સાથેના કેપ્શનમાં લખ્યું - હું આ ઉત્પીડનથી કંટાળી ગઈ છું. આ 2018 ના Me Too થી ચાલી રહ્યું છે. આખરે આજે કંટાળીને મેં પોલીસને ફોન કર્યો. કૃપા કરીને કોઈ મને મદદ કરો. મોડું થાય તે પહેલાં કંઈક કરો.
સમગ્ર મામલો શું છે?
તનુશ્રી દત્તાએ 2018માં Me Too દરમિયાન એક્ટર નાના પાટેકર પર ગંભીર આરોપો લગાવ્યા હતા. એક્ટ્રેસે આરોપ લગાવ્યો હતો કે 2008માં આવેલી ફિલ્મ 'હોર્ન ઓકે પ્લીઝ' ના એક ગીતના શૂટિંગ દરમિયાન નાના પાટેકરે તેનું શારીરિક શોષણ કર્યું હતું. જોકે પોલીસને એક્ટર વિરુદ્ધ કોઈ પુરાવા મળ્યા નથી.
