સુરત સિવિલમાંથી બાળકીને સાથે રાખી ચોરી કરતી 2 મહિલા ઝડપાઇ

• દર્દી અને તેમના સગાઓના સામાન કરતી ચોરતી
  
• હોસ્પિટલમાં ભીડ થાય ત્યાં ચોરીને આપતી અંજામ
• શંકા ના જાય માટે બાળકીને પણ સાથે રાખતી હતી

હાલમાં ચોરી માટે વિચિત્ર કિસ્સાઓ સામે આવતાં હોય છે. જેમાં સુરતની નવી સિવિલ હોસ્પિટલમાં બાળકીને સાથે રાખીને ચોરીને અંજામ આપતી બે મહિલાઓને ઝડપી પાડવામાં આવી છે. એટલું જ નહીં આ મહિલાઓ છ મહિના પહેલા પણ ચોરી કરતી પકડાઈ હતી. ત્યારબાદ આજે ફરી ચોરી કરવા આવતા સિક્યોરિટી દ્વારા બંને મહિલાઓને પોલીસને સોંપી દેવામાં આવી છે.

આ અંગેની માહિતી આપતાં સુરત સિવિલના સિક્યોરિટી અધિકારીએ જણાવ્યું કે, આ મહિલાઓ દ્વારા છ મહિના પહેલા ઝડપી પાડવામાં આવી હતી. ત્યારબાદ પોલીસમાં ફરિયાદ કરીને સોંપી દેવાઈ હતી. થોડા સમયથી આ બંને મહિલાઓ એક બાળકી સાથે ફરી સિવિલ હોસ્પિટલમાં આવીને ચોરી કરતી હોવાની જાણ થઈ હતી. જેથી તેમના પર નજર રાખવામાં આવી રહી હતી. આજે બંને મહિલાને પાર્કિંગમાંથી બાળકી સાથે ઝડપી પાડવામાં આવી હતી.

જ્યારે મહિલાઓની ચોરી કરવાની મોડસ ઓપરન્ડી અંગે જણાવ્યું કે, સુરત સિવિલ હોસ્પિટલમાં જે ઓપીડી કે અન્ય જગ્યા ઉપર ભીડ થાય છે ત્યાં બાળકી સાથે પહોંચી જાય છે અને ભીડનો લાભ ઉઠાવી ત્યાંથી દર્દી અને તેમના સગાઓના સામાનની ચોરી કરે છે. આ સાથે જ બાળકીની ફાઈલ અને એક્સપાયરી ડેટ વાળી દવા પણ સાથે રાખે છે. સિવિલમાં આવતા જતા લોકો પાસે રૂપિયાની પણ માગણી કરે છે.

 છેલ્લા દોઢ મહિનામાં 10 જેટલા મોબાઈલની ચોરી કરી હોવાની જાણ થઈ હતી. દરમિયાન આ મહિલાઓ પણ ફરી સિવિલમાં આવવા લાગી હોવાની જાણ થઈ હતી. જેથી તેના પર નજર રાખીને આજે ઝડપી પાડવામાં આવી છે. આ મહિલાઓને સીસીટીવીમાં પણ તપાસ કરવામાં આવી રહી છે. તેમજ ભીડનો લાભ ઉઠાવી ત્યાંથી દર્દી અને તેમના સગાઓના સામાનની ચોરી કરતી હતી.