પાકિસ્તાનનો નવો સુપરસ્ટાર... 24 વર્ષની ઉંમરે કરી યુનિસ ખાનના ખાસ રેકોર્ડની બરાબરી

પાકિસ્તાનને ટેસ્ટ ક્રિકેટનો નવો સુપરસ્ટાર મળ્યો છે. 24 વર્ષની ઉંમરે આ યુવા બેટ્સમેને અનુભવી યુનિસ ખાનના રેકોર્ડની બરાબરી કરી લીધી છે. મુલતાન ક્રિકેટ સ્ટેડિયમમાં આ બેટર ઇંગ્લિશ બોલરો માટે માથાનો દુખાવો બની ગયો હતો. અમે અબ્દુલ શફીક વિશે વાત કરી રહ્યા છીએ, જેમણે શાન મસૂદ સાથે મળીને ઈંગ્લેન્ડના બોલિંગની પોલ ખુલી નાખી હતી.

શફીકે જોરદાર સદી ફટકારી હતી

પાકિસ્તાન તરફથી ઇનિંગ્સની શરૂઆત કરવા આવેલા અબ્દુલ શફીક શરૂઆતથી જ ઇંગ્લેન્ડના બોલરો પર વર્ચસ્વ ધરાવતો દેખાતો હતો. સેઈમ અયુબ વહેલા પેવેલિયન પરત ફર્યા બાદ શફીકે શાન મસૂદ સાથે મળીને યજમાન ટીમની ઇનિંગ્સને શાનદાર રીતે સંભાળી હતી.

શફીક યુનિસ ખાનના સ્તરે પહોંચ્યો હતો

અબ્દુલ શફીકે માત્ર 24 વર્ષની ઉંમરમાં ફટકારેલી આ પાંચમી સદી છે. આ સાથે યુવા બેટ્સમેને યુનિસ ખાનના રેકોર્ડની પણ બરાબરી કરી લીધી છે. હકીકતમાં, યુનિસે 25 વર્ષનો થતાં પહેલાં ક્રિકેટના સૌથી લાંબા ફોર્મેટમાં 5 સદી પણ ફટકારી હતી, જેની હવે શફીકે બરાબરી કરી લીધી છે. શફીકે કેપ્ટન શાન મસૂદ સાથે મળીને ઈંગ્લિશ બોલરોને ઘણી પરેશાન કરી હતી. બંનેએ બીજી વિકેટ માટે 253 રનની યાદગાર ભાગીદારી કરી હતી, જે આ વિકેટ માટે પાકિસ્તાન દ્વારા કરવામાં આવેલી ચોથી સૌથી મોટી ભાગીદારી છે.

કેપ્ટને પણ યાદગાર ઇનિંગ રમી હતી

પાકિસ્તાનના કેપ્ટન શાન મસૂદ પણ મુલતાનના મેદાન પર પોતાના બેટથી ચમક બતાવી હતી. શાને શાનદાર બેટિંગ કરી અને માત્ર 102 બોલમાં તેની ટેસ્ટ કારકિર્દીની પાંચમી સદી પૂરી કરી હતી. કેપ્ટન તરીકે શાનની પણ આ પ્રથમ સદી છે. 177 બોલનો સામનો કરીને શાને 151 રનની જોરદાર ઇનિંગ રમી હતી અને આ દરમિયાન તેણે 13 ફોર અને 2 સિક્સર ફટકારી હતી.