Banaskantha: ધાનેરા પોલીસે 895 ગ્રામ અફીણ રસ સાથે 3 શખ્સોની કરી અટકાયત

ગુજરાતમાં નશો કરવા પર પ્રતિબંધ છે. તોપણ ગુજરાતમાં બેફામ દારુ અને નશીલા પદાર્થોનું સેવન કરવામાં આવે છે. બુટલેગરો અને નશીલા પદાર્થોનો વેપાર કરનારા પોલીસનો ડર રાખ્યા વગર નશાનો વેપાર ખુલ્લેઆમ કરતા હોય છે. જેના સેવનથી લોકોના ઘર બર્બાદ થઈ જતા હોય છે. ત્યારે બનાસકાંઠાના ધાનેરામાં પોલીસે નેનાવા બોર્ડર પાસેથી અફીણનો રસ ઝડપી લઈને આરોપીઓ સામે કાર્યવાહી કરી હતી.

પોલીસે અફીણનો રસ ઝડપ્યો

સૂત્રો પાસેથી મળતી માહિતી મુજબ ધાનેરા પોલીસે વાહન ચેકિંગ દરમિયાન નેનાવા બોર્ડર પાસે ચેકિંગ દરમિયાન બજરંગ ટ્રાવેલ્સમાં કાળા રંગના બેગમાં અફીણનો રસ ઝડપ્યો હતો. જેમાં પોલીસે 895 ગ્રામ અફીણ રસ સાથે 3 શખ્સોની અટકાયત કરી હતી. જે મામલે ધાનેરા પોલીસે રૂ.89,500નું અફીણ સહિત લક્ઝરી બસ મુદ્દામાલ જપ્ત કર્યો હતો. બનાસકાંઠા જિલ્લા સહિત ગુજરાતમાં દારુ અને નશીલા પદાર્થોનો વેપાર વધી રહ્યો છે.

આરોપીઓ સામે કાર્યવાહી

ધાનેરા પોલીસે મુદ્દામાલ સાથે 3 શખ્સોની અટકાયત કરીને NDPS એક્ટ હેઠળ કાર્યવાહી હાથ ધરી હતી. ત્યારે બનાસકાંઠામાં નશીલા પદાર્થોનો વેપલો સતત વધી ગયો છે. જેની સામે પોલીસ કડકમાં કડક કાર્યવાહી કરી છે. અવારનવાર પોલીસ નશીલા પદાર્થોને ઝડપી લે છે. ગુજરાતના ઘણા જિલ્લાઓમાં ખુલ્લેઆમ ગેરકાયદેસર રીતે વેપાર થતો હોય છે. હાલ નવસારીમાં જ 1 કરોડના દારુનું કંટેઈનર ગ્રામ્ય પોલીસે ઝડપી લઈને કાર્યવાહી કરી હતી.