Dwarka: ગોમતી નદીમાં સ્નાન કરવા જતા 3 લોકો ડૂબ્યા, શોધખોળ હાથ ધરાઈ

નદી કે તળાવમાં નહાવા જતા લોકો ઘણીવાર ડૂબી જતાં હોય છે. તરતા આવડતું ન હોવાથી તેઓ પોતાનો જીવ ગુમાવી બેસે છે. તેવી ઘણી ઘટનાઓ ગુજરાતમાં અવારનવાર બને છે. તો સુપ્રસિદ્ધ યાત્રાધામ દ્વારકામાં આવેલા ગોમતી નદીમાં 3 લોકોના ડૂબવાની ઘટના સામે આવી છે. પાટણથી પરિવાર યાત્રાધામ દ્વારકામાં દર્શન કરવા માટે આવ્યા હતા. દર્શન બાદ તેઓ ગોમતી નદીમાં સ્નાન માટે ઉતર્યા હતા. જે દરમિયાન સ્નાન કરતા 3 લોકો એકાએક ડૂબવા લાગ્યા હતા.

 1 યુવકને બચાવી લેવાયો

ગોમતી નદીમાં સ્નાન દરમિયાન 3 લોકો ડૂબવા લાગ્યા હતા. જેમાં 3 લોકો લાપતા થઈ જતા સ્થાનિક તરવૈયાઓએ બચાવ કામગીરી શરુ કરી હતી. જે દરમિયાન સ્થાનિક તરવૈયાઓએ નદીમાં ડૂબકી લગાવીને ભાળ મેળવવાનો પ્રયાસ કર્યો હતો. નદીમાં ડૂબતા 2 લોકો લાપતા થઈ ગયા હતા. તો તરવૈયાઓએ 1 યુવકને બચાવી લીધો હતો. જે બાદ યુવકને 108ની મદદથી તેને દ્વારકા સરકારી હોસ્પિટલમાં સારવાર હેઠળ ખસેડવામાં આવ્યો હતો. તંત્ર અને ફાયર ટીમ દ્વારા બોટની મદદથી 2 લાપતા લોકોને શોધખોળ કરવામાં આવી રહી છે.

શોધખોળ હાથ ધરવામાં આવી

જોકે,મળતી માહિતી મુજબ પરિવાર સાથે આવેલા પાટણ જિલ્લાના યાત્રિક મામા અને ભાણેજ લાપતા થઈ જતા તેઓની ભાળ મેળવવાનો પ્રયાસ કરવામાં આવી રહ્યો છે. ફાયર ટીમ અને સ્થાનિક તરવૈયાઓ લાપતા 2 લોકોની શોધખોળ કરી રહ્યા છે. 2 લોકો લાપતા થઈ જતાં લોકોનું ટોળું એકઠું થઈ ગયું હતું. 2 લોકોનો નદીમાં પતો ન લાગતા તેમના પરિવારના લોકોમાં દુ:ખની લાગણી જોવા મળી હતી.