વિરમગામમાં હેડ કોન્સ્ટેબલ રૂ. 2 લાખની લાંચ લેતા ઝડપાયો

• વિરમગામાના હેડ કોન્સ્ટેબલ, હોમગાર્ડનો જવાન ઝડપાયો
  
• જમીન મુદ્દે ગુનો દાખલ નહીં કરવા માંગી હતી લાંચ
• હેડ કોન્સ્ટેબલ બાબુલાલ પરમારની ધરપકડ

રાજ્યમાં લાંચ લેતા અધિકારીઓ પર એસબી દ્વારા કડક કાર્યવાહી કરવામાં આવી રહી છે. જેમાં અમદાવાદના વિરમગામમાં ACBની સફળ ટ્રેપ કરવામાં આવી હતી. વિરમગામ ટાઉન પોલીસ સ્ટેશનના હેડ કોન્સ્ટેબલ અને હોમગાર્ડના જવાન લાંચ લેતા ઝડપાયા હતા. ફરિયાદી વિરૂદ્ધ જમીનની બાબતમાં ગુનો દાખલ ન કરવા બે લાખની લાંચ માગી હતી.

આ અંગેની માહિતી અનુસાર, આરોપી બાબુલાલ પરમાર,હેડ કોન્સ્ટેબલ વિરમગામ ટાઉન પોલીસ સ્ટેશન જ્યારે રિઝવાન મહંમદ રફીક મેમણ,હોમગાર્ડ, વિરમગામ ટાઉન પોલીસ સ્ટેશન સામે ACBએ સફળ ટ્રેપ કરીને ઝડપી લીધા છે. જેમાં 2 લાખ રુપિયાની રકમની માંગણી કરવામાં આવી હતી. આરોપીઓ દ્વારા 2 લાખ લાંચની રકમ સ્વિકારવામાં આવેલી છે. એસીબીની ટીમે તેમની પાસેથી બે લાખની રકમ રીકવર કરી છે.

વિરમગામ ટાઉન પોલીસ સ્ટેશન ખાતે ગુન્હો બન્યો હતો. આ કામના ફરીયાદીની વિરુદ્ધમાં વિરમગામ ટાઉન પોલીસ સ્ટેશન ખાતે જમીન પ્રકરણ બાબતે અરજી થયેલ હોય અને જે અરજીના કામે ફરિયાદીને નિવેદન લખાવવા સારું બોલાવી ફરીયાદી વિરૂધ્ધમાં ગુન્હો દાખલ નહિ કરવા પેટે આ કામના આક્ષેપિત નં.1 એ ફરિયાદી પાસે લાંચ પેટે રૂ.2,00,000/- ની લાંચ ની માંગણી કરતા, ફરીયાદી લાંચની રકમ આપવા માંગતા ન હોય એ.સી.બી નો સંપર્ક કરતાં ફરીયાદીની ફરીયાદ આધારે લાંચનું છટકું ગોઠવવામાં આવ્યું હતું.

આ લાંચના છટકા દરમિયાન પંચ-1 ની હાજરીમાં બન્ને આક્ષેપિતોએ હેતુલક્ષી વાતચીત કરી આક્ષેપિત નં.1 એ લાંચના નાણાં આક્ષેપીત નં.2 ને આપી દેવા જણાવી આક્ષેપિત નં.2 એ લાંચના નાણાં સ્વીકાર્યા હતા. જેને લઈ એસીબીએ બંને સામે ગુન્હો દાખલ કર્યો છે.