Kheda: મહેમદાવાદમાં લગ્ન પ્રસંગમાં થઈ જૂથ અથડામણ, 8 લોકો સામે નામજોગ ફરિયાદ

ખેડા જિલ્લાના મહેમદાવાદમાં એક જૂથ અથડામણનો મામલો સામે આવ્યો છે. જૂના ગોઠાજ ગામે એક લગ્ન પ્રસંગ ચાલી રહ્યો હતો. જે લગ્નપ્રસંગમાં લોકોને જતા રોકવા બાબતે બોલાચાલી થઈ હતી. લગ્ન પ્રસંગમાં જતા રોકવા બાબતે થયેલી બબાલે ઉગ્ર સ્વરુપ ધારણ કરી લીધું હતું. જેના લીધે 2 જૂથો એકબીજાના આમને સામને આવી ગયા હતા. લોકો એકબીજા સાથે મારામારી કરવા લાગ્યા હતા. જે બાદ 50થી વધુ લોકોના ટોળાએ સામસામે પથ્થરમારો કર્યો હતો. 

 2 જૂથો વચ્ચે અથડામણ

મહેમદાવાદના જૂની ગોઠાજ ગામના લગ્નપ્રસંગમાં 2 જૂથો વચ્ચે થયેલી અથડામણમાં ઘણા લોકો ઘાયલ થયા હતા. જે સમગ્ર ઘટનાના લાઈવ વીડિયો પણ સામે આવ્યા હતા. જૂથ અથડામણના લીધે ગામમાં ભારે અફરાતફરીનો માહોલ સર્જાયો હતો. અથડામણના પગલે ગામમાં અરાજકતા ફેલાઈ ગઈ હતી. લગ્નપ્રસંગમાં 2 જૂથો ધારિયા, લાકડા અને દંડા વડે મારામારી કરી હતી. જેમાં ઘાયલોને સારવાર હેઠળ ખસેડવામાં આવ્યા હતા. બે જૂથો દ્વારા સામસામે પોલીસ ફરિયાદ નોંધાઈ હતી. જેમાં 8 લોકો સામે નામજોગ ફરિયાદ નોંધાવવામાં આવી હતી.

સામસામે પોલીસ ફરિયાદ

સમગ્ર મામલે કપડવંજ DYSPની પ્રતિક્રિયા સામે આવી હતી તેમાં તેમણે કહ્યું કે, જૂની ગોઠાજ ગામમાં રહેતા કૌટુંબિક સગાઓ વચ્ચે થયો ઝઘડો હતો.લગ્ન પ્રસંગમાં એક તરફે લોકોને જતા અટકાવ્યા હતા. તો બીજા પક્ષે કહ્યું કે, તમે કેમ લોકોને રોકી રહ્યા છો તે મામલે અથડામણ થઈ હતી. જેમાં ઘણા લોકો ઈજાગ્રસ્ત થયા છે. સમગ્ર મામલે નોફીઝમિયા અને મહેબૂબ મિયા બંને તરફથી ફરિયાદ દાખલ કરવામાં આવી છે. તો બંને પક્ષેથી ચાર ચાર આરોપીઓ છે. પોલીસે ફરિયાદ નોંધીને આગળની કાર્યવાહી ચાલુ કરી છે.