રાજકોટ ગ્રામ્ય લોકલ ક્રાઈમ બ્રાન્ચ (LCB)ની ટીમે જસદણ પંથકમાં ચાલતી ગેરકાયદેસર પ્રવૃત્તિઓ સામે લાલ આંખ કરી છે. જસદણના જૂના જસાપર ગામ પાસે વહેતી નદીના કાંઠે એક વાડી નજીક મોટા પાયે ધમધમતી દેશી દારૂની ભઠ્ઠી પર પોલીસે સફળ દરોડો પાડ્યો છે. આ ઓપરેશન દરમિયાન LCBની ટીમે ઘટનાસ્થળેથી કુલ રૂ.1.36 લાખની કિંમતનો મુદ્દામાલ જપ્ત કર્યો છે. પોલીસની આ આકસ્મિક રેડને પગલે સ્થાનિક બુટલેગરોમાં ફફડાટ વ્યાપી ગયો છે.
મોટી માત્રામાં આથો અને કેફી પ્રવાહી જપ્ત
પોલીસ સૂત્રો પાસેથી મળતી માહિતી મુજબ રેડ દરમિયાન ઘટનાસ્થળેથી 420 લીટર તૈયાર દેશી દારૂ જેવું કેફી પ્રવાહી તેમજ 1,500 લીટર જેટલો દારૂ બનાવવાનો કાચો આથો મળી આવ્યો હતો. પોલીસે કાયદેસરની કાર્યવાહી કરીને આથાના મોટા જથ્થાનો સ્થળ પર જ નાશ કર્યો હતો. આ દરોડા દરમિયાન પોલીસને જોઈને એક આરોપી અંધારાનો લાભ ઉઠાવીને નાસી છૂટવામાં સફળ રહ્યો હતો. પોલીસે ભઠ્ઠી ચલાવવા માટે ઉપયોગમાં લેવાતા સાધનો, પાણીની મોટર, મોટા પ્લાસ્ટિકના ટાંકા અને પાઇપો સહિતનો તમામ સામાન કબ્જે કર્યો છે.
