નવસારી જિલ્લામાં ભ્રષ્ટાચાર સામે વલસાડ-ડાંગ એસીબી (ACB)ની ટીમે એક મોટી અને સફળ કાર્યવાહી કરી છે. જમીન સંબંધિત સરકારી મંજૂરીઓ આપવાના બહાને લાંચની માંગણી કરનારા બે શખ્સો એસીબીના સકંજામાં આવી ગયા છે. ફરિયાદીને પોતાની જમીનમાંથી માટી બહાર લઈ જવા માટે ગ્રામ પંચાયતની એનઓસી (NOC), નકશો અને પેઢીનામું તૈયાર કરાવી આપવાનું હતું. આ કાયદેસરની વહીવટી કામગીરી કરી આપવાના અવેજ પેટે આરોપીઓ દ્વારા 40 હજાર રૂપિયાની મસમોટી લાંચની માંગણી કરવામાં આવી હતી.
ચીખલીની ઓફિસમાં ગોઠવાયેલું લાંચનું છટકું
ભ્રષ્ટ અધિકારીઓને પાઠ ભણાવવા માટે ફરિયાદીએ આ અંગે વલસાડ-ડાંગ એસીબીનો સંપર્ક કર્યો હતો, જેના આધારે એસીબીની ટીમે પૂર્વઆયોજિત પ્લાન મુજબ ચીખલી ગ્રામ પંચાયત શોપિંગ સેન્ટર ખાતે આવેલી એક કોન્ટ્રાક્ટરની ઓફિસમાં લાંચનું છટકું ગોઠવ્યું હતું. આ સ્થળે નવસારી જિલ્લા તલાટી મંડળના પ્રમુખ અને તલાવચોરા ગ્રામ પંચાયતના ઇન્ચાર્જ તલાટી કમ મંત્રી કમલેશ દેસાઈ (રબારી) અને તેમનો વચેટિયો ફરિયાદી પાસેથી લાંચની રકમ સ્વીકારી રહ્યા હતા. બરાબર એ જ સમયે એસીબીના અધિકારીઓએ ત્રાટકીને બંનેને રૂ. 40,000ની રોકડ રકમ સાથે રંગેહાથ દબોચી લીધા હતા.
