પંચમહાલ જિલ્લામાં કેફી પદાર્થો અને ડ્રગ્સના દૂષણને ડામવા માટે એલસીબી અને સ્થાનિક પોલીસ દ્વારા ચલાવવામાં આવી રહેલી ઝુંબેશ અંતર્ગત એક મોટી સફળતા મળી છે. જિલ્લાના ઘોઘંબા તાલુકાના ગુણેશિયા ગામેથી પોલીસે બાતમીના આધારે દરોડો પાડીને ખેતરમાં ગેરકાયદેસર રીતે કરવામાં આવેલી લીલા ગાંજાની ખેતીનો પર્દાફાશ કર્યો છે. પોલીસે ઘટનાસ્થળેથી લાખોની કિંમતના ગાંજાના છોડ જપ્ત કરીને એક આરોપીની ધરપકડ કરી છે.
અન્ય પાકની આડમાં થતી હતી નશાની ખેતી
ઘોઘંબાના ગુણેશિયા ગામે રહેતા મંગાભાઈ શનાભાઈ નાયક નામના શખ્સે પોતાના ખેતરમાં કોઈને શંકા ન જાય તે રીતે અન્ય પાકની આડમાં લીલા ગાંજાના છોડ વાવ્યા હોવાની ચોક્કસ માહિતી પોલીસને મળી હતી. આ બાતમીના આધારે પોલીસે રેડ પાડતા ખેતરમાંથી ગાંજાના નાના-મોટા કુલ 16 નંગ લીલા છોડ મળી આવ્યા હતા. વનસ્પતિજન્ય લીલા ગાંજાના આ જથ્થાનું તોલમાપ કરતા તેનું કુલ વજન 9.050 કિલોગ્રામ (આશરે 9 કિલો) જેટલું થવા જતું હતું, જેની આંતરરાષ્ટ્રીય બજાર કિંમત રૂ.4,52,500 (ચાર લાખ બાવન હજાર પાંચસો) આંકવામાં આવી છે.
