Agriculture News: દેવભૂમિ દ્વારકા જિલ્લાના ખેડૂતો ટ્રેક્ટર સહાય માટે 29 નવેમ્બર સુધી અરજી કરી શકશે

ચાલુ વર્ષમાં મહત્તમ સિદ્ધિ પ્રાપ્ત કરી શકાય તે હેતુથી રાજ્ય સરકાર દ્વારા વર્ષ ૨૦૨૫-૨૬ માટે ટ્રેક્ટર ઘટક હેઠળ સહાય માટેની અરજીઓ સ્વીકારવા આઈ ખેડૂત પોર્ટલ ત્રીજી વખત ખોલવામાં આવી રહ્યું છે.રાજ્યના તમામ જિલ્લાઓમાં ટ્રેક્ટર ઘટક હેઠળ ખેડૂત લાભાર્થીઓની અરજીઓ સ્વીકારવા માટે આ પોર્ટલ તા.૨૯/૧૧/૨૦૨૫ સુધી ખુલ્લું રહેશે. આ યોજના હેઠળ લાભ મેળવવા ઇચ્છુક ખેડૂતોએ અરજી કરી શકાશે.

ખેડૂતોએ નોંધણી કરવી ફરજિયાત

આઇ ખેડુત પોર્ટલ પર (https://ikhedut.gujarat.gov.in/site/) વર્ષ ૨૦૨૫-૨૬ માટે ખેતીવાડી ખાતાની વિવિધ સહાય યોજનાઓનો લાભ લેવા માટે આઇ ખેડુત પોર્ટલ પર અરજી કરતાં પહેલા ખેડૂતોએ નોંધણી કરવી ફરજિયાત છે.નોંધણી બાદ યોજનાઓનો લાભ મેળવવા માટે ઓનલાઇન અરજી કરી શકાશે તેમ જિલ્લા ખેતીવાડી અધિકારી,દેવભૂમિ દ્વારકાની યાદીમાં જણાવાયું છે.

80,000 ખેડૂતોને સહાય આપવાના લક્ષ્યાંક

ગુજરાત સરકારે બજેટ જોગવાઈમાં વધારો કરીને ટ્રેક્ટરની ખરીદી માટે રાજ્યના 80,000 ખેડૂતોને સહાય આપવાના લક્ષ્યાંક સાથે રૂ.800 કરોડની નાણાકીય સહાય આપવાની જોગવાઈ મંજૂર કરી છે. જે ગત વર્ષની બજેટ જોગવાઈની સરખામણીએ બમણી છે. આ ઉપરાંત કંબાઈન હાર્વેસ્ટર, પાવર ટીલર તેમજ રોટાવેટર, ઓટોમેટીક ઓરણી, પ્લાઉ, થ્રેશર જેવા ટ્રેક્ટર સંચાલિત સાધનો માટે પણ બજેટમાં રૂ. 590.98 કરોડની જોગવાઈ મંજૂર કરવામાં આવી છે.