Ahmedabad Plane Crash પહેલો વીડિયો સોશિયલ મીડિયા પર થયો વાયરલ!

અમદાવાદથી લંડન જતી એર ઈન્ડિયાની ફ્લાઈટ AI-171 ટેકઓફ થયાના થોડા સમય પછી જ ક્રેશ થઈ ગઈ. પ્લેન ક્રેશને લગતા ઘણા વીડિયો સોશિયલ મીડિયા પર વાયરલ થઈ રહ્યા છે. જેમાંથી ઘણા ફેક વીડિયો છે, તેથી ફેક વીડિયો પર વિશ્વાસ ન કરો.

ભારત સરકારના માહિતી અને પ્રસારણ મંત્રાલય હેઠળ આવતા પ્રેસ ઈન્ફર્મેશન બ્યુરો (PIB) એ આવા જ એક નકલી વીડિયો વિશે પોસ્ટ કર્યું છે અને કહ્યું છે કે દીપક શર્મા નામના વ્યક્તિ દ્વારા શેર કરાયેલ પ્લેન ક્રેશનો વીડિયો એર ઈન્ડિયાનો હોવાનો દાવો કર્યો છે, પરંતુ તે દાવો ખોટો છે.

PIB મુજબ આ વીડિયો જાન્યુઆરી 2023 માં નેપાળમાં થયેલા પ્લેન ક્રેશનો છે. "ફક્ત સત્તાવાર સ્ત્રોતોમાંથી મળેલી માહિતી પર જ વિશ્વાસ કરો. અમદાવાદ પ્લેન ક્રેશ સંબંધિત અધિકૃત માહિતી માટે, કેન્દ્ર સરકાર દ્વારા આપવામાં આવેલા હેલ્પલાઈન નંબર પર સંપર્ક કરો."

ઉડાન બાદ થોડી જ ક્ષણમાં જાહેર કરવામાં આવ્યો મેડે કોલ

તમને જણાવી દઈએ કે એર ઈન્ડિયાના વિમાન બોઈંગ 787 ડ્રીમલાઈનરે સરદાર વલ્લભભાઈ પટેલ આંતરરાષ્ટ્રીય વિમાનમથકના રનવે 23 પરથી 13.39 વાગ્યે ઉડાન ભરી હતી. આ પછી થોડી વારમાં જ મેડે કોલ જાહેર કરવામાં આવ્યો હતો, પરંતુ કોકપીટમાંથી કોઈ વધુ સંદેશ મળ્યો ન હતો.

આ વિમાનનું પાયલોટ કેપ્ટન સુમિત સભરવાલ હતો, જેઓ એર ઈન્ડિયાના લાંબા સમયથી પાયલોટ છે અને 8,200 કલાકથી વધુ ઉડાનનો અનુભવ ધરાવે છે. ફર્સ્ટ ઓફિસર ક્લાઈવ કુંદરે 1,100 કલાક ઉડાન ભરી હતી.

ટેક-ઓફ દરમિયાન ક્રેશ થયું વિમાન

આ અકસ્માત અમદાવાદના મેઘાણી નગર વિસ્તાર નજીક થયો હતો. ટેક-ઓફ દરમિયાન વિમાન ક્રેશ થયું હતું. વિમાન ક્રેશ થયા પછી તરત જ સ્થળ પરથી આકાશમાં કાળો ધુમાડો નીકળતો જોવા મળ્યો હતો. આ કારણે વિમાન ક્રેશમાં ભારે નુકસાનનો અંદાજ છે. વિમાન ક્રેશ થયા પછી ફાયર બ્રિગેડના ઘણા વાહનો ઘટનાસ્થળે પહોંચી ગયા છે. રાહત અને બચાવ કાર્ય કરવામાં આવી રહ્યું છે. પરંતુ આ અકસ્માતમાં જાનમાલના નુકસાન અંગે હજુ સુધી કોઈ સત્તાવાર માહિતી જાહેર કરવામાં આવી નથી. અકસ્માત સમયે વિમાનમાં 242 લોકો સવાર હતા, જેમાં 230 મુસાફરો, 10 કેબિન ક્રૂ અને બે પાઈલટનો સમાવેશ થાય છે.

એર ઈન્ડિયાએ તેના સોશિયલ મીડિયા હેન્ડલ 'એક્સ' પર જણાવ્યું હતું કે, "ફ્લાઈટ AI171 અમદાવાદથી લંડન ગેટવિક જઈ રહી હતી. આજે 12 જૂને તેનો અકસ્માત થયો છે. અમે હાલમાં વિગતોની તપાસ કરી રહ્યા છીએ અને આ બાબતે વધુ માહિતી અમારા સોશિયલ મીડિયા પ્લેટફોર્મ 'એક્સ' અને એર ઈન્ડિયાની વેબસાઈટ પર શેર કરીશું."