Ahmedabad News: એશિયન ગ્લોબલ CBSE સ્કૂલ દ્વારા RTEના 46 વિદ્યાર્થીઓ સાથે ભેદભાવ કર્યાનો આક્ષેપ, DEOએ તપાસના આદેશ આપ્યા

ગુજરાતમાં ખાનગી સ્કૂલોમાં RTEના વિદ્યાર્થીઓ સાથે ભેદભાવ રખાતો હોવાની અનેક રજૂઆતો સામે આવતી હોય છે. ત્યારે અમદાવાદમાં એશિયન ગ્લોબલ CBSE સ્કૂલ દ્વારા RTEના વિદ્યાર્થીઓ સાથે ભેદભાવ કરાયો હોવા અંગે જિલ્લા શિક્ષણ અધિકારીને ફરિયાદ મળતાં તેમણે સ્કૂલને નોટીસ ફટકારી શિક્ષણ નિરીક્ષકને શાળાએ રૂબરૂ જઈને તપાસ કરવાનો આદેશ આપ્યો છે.

વાલીઓ દ્વારા ફરિયાદ કરવામાં આવી છે

પ્રાપ્ત વિગતો પ્રમાણે અમદાવાદની એશિયન ગ્લોબલ સીબીએસસી સ્કૂલ દ્વારા RTEના 46 વિદ્યાર્થીઓ સાથે ભેદભાવ કરવામાં આવ્યો હોવાની જિલ્લા શિક્ષણ અધિકારીને ફરિયાદ મળી હતી. વાલીઓની ફરિયાદના આધારે DEOએ સ્કૂલને કારણદર્શક નોટીસ ફટકારી છે. તેમજ શિક્ષણ નિરીક્ષકને સ્કૂલમાં જઈને તપાસ કરવાનો આદેશ આપ્યો છે. આ અંગે DEOએ જણાવ્યું હતું કે, RTE અંતર્ગત પ્રવેશ મેળવેલા વિદ્યાર્થીઓને અલગ વર્ગમાં બેસાડવામાં આવે છે.અમારી પાસે વાલીઓ દ્વારા ફરિયાદ કરવામાં આવી છે.

વિદ્યાર્થીઓને કેન્ટીનમાં પ્રવેશ બંધીની ફરિયાદ

તેમણે વધુમાં કહ્યું હતું કે, વાલીઓની ફરિયાદ અનુસાર વિદ્યાર્થીઓને કેન્ટીનમાં પ્રવેશ બંધી ફરમાવાઈ છે. રમત ગમતના સાધનો ઉપયોગ કરવા દેવામાં આવતો નથી.ફરિયાદ મળતા અમે તાત્કાલિક શાળાને કારણદર્શક નોટિસ ફટકારી છે.શિક્ષણ નિરીક્ષકને શાળાએ રૂબરૂ જઈને તપાસના આદેશ આપ્યા છે. તપાસ બાદ શાળા વિરુદ્ધ દંડનીય કાર્યવાહી કરવામાં આવશે.