Ahmedabad News: સોલામાં દેવ રેસીડેન્સી સોસાયટીમાં ભજન બંધ કરવા બાબતે મારામારી, મહિલાએ ખુરશીઓ અને સામાન ફેંક્યા

અમદાવાદના સોલામાં ભજન બાબતે મારામારી થઈ હોવાનો બનાવ સામે આવ્યો છે. સોલા વિસ્તારની દેવ રેસિડેન્સીમાં મારામારીની ઘટના સામે આવી છે. એક મહિલાએ કોઈ બિમાર હોવાનું કહીને ભજન રોકવાનું કહ્યું હતું. આ દરમિયાન મામલો બિચક્યો હતો અને મારામારી શરૂ થઈ ગઈ હતી. મારામારીની સમગ્ર ઘટના સીસીટીવીમાં કેદ થઈ ગઈ છે.

મહિલાએ ખુરશી અને ભજનનો સામાન ફેંક્યો

પ્રાપ્ત વિગતો પ્રમાણે અમદાવાદના સોલામાં દેવ રેસીડેન્સી સોસાયટીમાં કોઈ બિમાર હોવાથી એક મહિલાએ ભજન રોકવા માટે કહ્યું હતું. આ દરમિયાન મામલો ગરમાયો હતો. મહિલા અને ભજન કર્તાઓ વચ્ચે મારામારી શરૂ થઈ ગઈ હતી. મહિલાએ ખુરશી અને સામાન ફેંકી દીધો હતો અને અન્ય મહિલાઓને ભજન કરતાં રોકી હતી. આ સમગ્ર ઘટના સીસીટીવી કેમેરામાં કેદ થઈ ગઈ હતી.

બહારથી આવેલા એક વ્યક્તિએ આપી ધમકી

આ ઉપરાંત બહારથી આવેલા એક વ્યક્તિએ પણ ભજન કરી રહેલી મહિલાઓને ધમકાવી હોવાનો આક્ષેપ કરવામાં આવ્યો છે. ફ્લેટની ભજન મંડળી તેમજ કમિટીએ ભજન રોકનાર મહિલા અને બહારથી આવેલા વ્યક્તિ સામે કડક કાર્યવાહીની માગ કરી છે. સોસાયટીમાં સરેઆમ મારામારી અને સામાન ફેંકવાની ઘટના સીસીટીવી કેમેરામાં કેદ થઈ ગઈ હતી. હજુ સુધી આ મામલે કોઈ પોલીસ ફરિયાદ થઈ હોવાનું જાણવા મળ્યું નથી.