Ahmedabad News: શહેરમાં વધુ એક હજાર CCTV કેમેરા લગાવવાનું આયોજન, ચાર કરોડનો ખર્ચ કરાશે

અમદાવાદ શહેરમાં મહાનગર પાલિકા દ્વારા વધુ એક હજાર સીસીટીવી કેમેરા લગાવવાનું આયોજન કરવામાં આવ્યું છે. આ કેમેરા લગાડવા પાછળ ચારેક કરોડનો ખર્ચ કરાશે. શહેરમાં 5600 કેમેરાનું નેટવર્ક ઉભુ કરાયું છે. જે પૈકીના મોટાભાગના કેમેરા બંધ હાલતમાં છે. આ કેમેરા રીપેર કરવાના ઘણા સમયથી વાયદાઓ કરાય છે પણ તે વાયદા પૂર્ણ થતાં નથી. ત્યાં એક હજાર કેમેરા લગાડવાનું આયોજન કરાયું છે.

ગંભીર બનાવો બને તેમાં પણ સીસીટીવી ફૂટેજ મળતા નથી

અમદાવાદ મહાનગર પાલિકાના સ્ટેન્ડિંગ કમિટીના ચેરમેન દેવાંગ દાણીએ કહ્યું હતું કે, શહેરમાં વધુ એક હજાર કેમેરા લગાડવાનું આયોજન કરવામાં આવ્યું છે. એક તરફ શહેરના જંક્શન, મહાનગર પાલિકાની બિલ્ડિંગો, અંડરપાસ સહિતની જગ્યાએ કેમેરા લગાવાયા છે.આ તમામ કેમેરાને સેન્ટ્રલ કંટ્રોલ રૂમ ખાતે એટેચ કરવામાં આવ્યા છે પરંતુ તે મોટાભાગના કેમેરા બંધ હોવાના કારણે યોગ્ય સંચાલન થતું નથી તો ઘણા ગંભીર બનાવો બને તેમાં પણ સીસીટીવી ફૂટેજ મળતા નથી

16 વધારાના ટ્રાફિક જંકશન પર CCTV ઇન્સ્ટોલેશનનું કામ

અમદાવાદ મ્યુનિસિપલ કોર્પોરેશન હેઠળ સ્માર્ટ સિટી ડેવલપમેન્ટ લિમિટેડે સેફ એન્ડ સિક્યોર અમદાવાદ પ્રોજેક્ટના ભાગ રૂપે CCTV કેમેરા લગાવીને શહેરવ્યાપી દેખરેખ વધારવાના પ્રયાસોને વધુ તીવ્ર બનાવવા પ્રયાસ હાથ ધરાયા છે.આ પહેલમાં શહેરના 105 હાઇ-ટ્રાફિક જંકશન પર CCTV કેમેરા લગાવવાનો સમાવેશ થાય છે.જાહેર સલામતી અને ટ્રાફિક વ્યવસ્થાપનને સુધારવાના હેતુથી શહેરના APMC અને CN વિદ્યાલય નજીક વાઘબકરી જંકશન પર CCTV કેમેરા લગાવવામાં આવ્યા છે.હાલમાં 16 વધારાના ટ્રાફિક જંકશન પર CCTV ઇન્સ્ટોલેશનનું કામ ચાલી રહ્યું છે અને 31 ઓગસ્ટ સુધીમાં પૂર્ણ થવાની અપેક્ષા છે.