અમદાવાદ જિલ્લાના ધોળકા તાલુકામાંથી એક ગમખ્વાર અકસ્માતની ઘટના ઘટી છે. ધોળકાના રામપુર ગામના પાટીયા નજીક એક બેફામ સ્પીડે આવી રહેલા અજાણ્યા વાહને બાઈક સવારોને અડફેટે લેતા ગંભીર હિટ એન્ડ રનની ઘટના સર્જાઈ છે. આ ગોઝારા અકસ્માતમાં બે નિર્દોષ વ્યક્તિઓએ પોતાના જીવ ગુમાવ્યા છે.
ઘટના સ્થળે જ બંનેના મોત
ઘટનાની મળતી માહિતી અનુસાર, રામપુર ગામના પાટીયા નજીકથી પસાર થઈ રહેલા બે બાઈક સવારોને બેફામ અને ગફલતભરી રીતે વાહન હંકારી કોઈ અજાણ્યા વાહન ચાલકે જોરદાર ટક્કર મારી હતી. આ અકસ્માત એટલો ભયાનક હતો કે, બંને બાઈક સવારો રોડ પર પટકાયા હતા. જે કારણે તેમને ગંભીર ઇજાઓ પહોંચી હતી. આ ગંભીર ઈજાના કારણે તેમના ઘટના સ્થળે જ મોત નિપજ્યા હતા. આ ઘટનાને પગલે સ્થાનિક વિસ્તારમાં અરેરાટી સાથે શોકની લાગણી ફેલાઈ ગઈ છે.
