નવરાત્રિનો પાવન પર્વ નજીક આવી રહ્યો છે, ત્યારે રાજ્યમાં ગરબા રમવા નીકળતી મહિલાઓની સુરક્ષા સુનિશ્ચિત કરવા માટે સી ટીમએ ખાસ તૈયારીઓ હાથ ધરી છે. સીઆઇડી ક્રાઇમ વુમન સેલના એડીજીપી અજય ચૌધરીએ સંદેશ ન્યૂઝ સાથેની ખાસ વાતચીતમાં જણાવ્યું કે, આ વર્ષે નવરાત્રિ દરમિયાન રાજ્યની એક પણ મહિલા સાથે કોઈ અનિચ્છનીય ઘટના ન બને તે માટે પોલીસ સંપૂર્ણપણે સજાગ છે. રાજ્યની કુલ 733 સી ટીમોએ ગરબા રમનારી મહિલાઓને તાલીમ આપી છે. આ પહેલનો મુખ્ય હેતુ મહિલાઓમાં સ્વરક્ષણ અને આત્મવિશ્વાસ વધારવાનો છે.
ગરબા ક્લાસીસમાં સ્વરક્ષણની તાલીમ
પોલીસ દ્વારા લેવાયેલા આ પગલાં હેઠળ, સી ટીમોએ રાજ્યભરના તમામ ગરબા ક્લાસીસની મુલાકાત લીધી હતી. આ મુલાકાત દરમિયાન, 3150થી વધુ અધિકારીઓ અને કર્મચારીઓએ ગરબા ક્લાસીસમાં હાજર રહીને મહિલાઓ અને યુવતીઓને સેલ્ફ ડિફેન્સની ટ્રેનિંગ આપી હતી. આ તાલીમમાં મહિલાઓને જો કોઈ મુશ્કેલી આવે તો કેવી રીતે પોતાનું રક્ષણ કરવું અને તાત્કાલિક પોલીસનો સંપર્ક કેવી રીતે કરવો તે અંગે માર્ગદર્શન આપવામાં આવ્યું હતું. આ પ્રયાસથી મહિલાઓમાં સુરક્ષાની ભાવના મજબૂત બની છે.
