દિવાળીના પર્વ દરમિયાન દિવાળીના પર્વ દરમિયાન ભ્રષ્ટાચારીઓને કાબુમાં લેવા એન્ટી કરપ્શન બ્યુરો દ્વારા એક્શન પ્લાન બનાવવામાં આવ્યો છે. એસીબીએ તમામ સરકારી કચેરીમાં પોતાના ખાનગી વોચર્સ ગોઠવ્યા છે. એસીબી દ્વારા ઓક્ટોબરના 13 જ દિવસમાં આઠ લાંચિયા કર્મચારીઓ અને અધિકારીઓને ઝડપી લીધા છે. તહેવાર ટાણે જ એસીબીની કાર્યવાહીથી લાંચિયા બાબુઓમાં ફફડાટ ફેલાયો છે.
બાબુઓને ખુશ રાખવા માટે ભેટ સોગાદો અપાતી હોય છે
ACBના મદદનીશ નિયામક જી.વી. પઢેરિયાએ કહ્યું હતું કે,દિવાળીના તહેવારોમાં કંપનીઓ કે કોર્પોરેટ ગ્રુપો દ્વારા અધિકારીઓને કિંમતી ભેટ સોગાદો ધરવામાં આવતી હોય છે. બાબુઓને ખુશ રાખવા માટે ભેટ સોગાદો અપાતી હોય છે. ત્યારે આવી ભેટ સોગાદો કયા અધિકારીઓ સ્વીકારે છે તેની માહિતી એકઠી કરવા માટે હવે એસીબી દ્વારા સરકારી કચેરીઓમાં વોચ ગોઠવવામાં આવી છે. જેથી કોઈ પણ કંપની વ્યક્તિ કે ઔદ્યોગિક કે કોર્પોરેટ ગ્રુપ દ્વારા સરકારી અધિકારીઓને દિવાળી નિમિત્તે આપવામાં આવતી લાંચ કે કીમતી ભેટ સોગાદોના વ્યવહારો રોકી શકાય અને કાયદેસરની કાર્યવાહી પણ થઈ શકે.
13 ઓક્ટોબરે અમદાવાદ અને અરવલ્લીમાં ACBની કાર્યવાહી
આજે 13 ઓક્ટોબરના રોજ અમદાવાદની સુભાષ બ્રિજ RTO કચેરીની જુનિયર કલાર્ક સ્વાતિબેન રાઠોડને ડુપ્લીકેટ આર.સી.બુક માટે ડોક્યુમેન્ટ વેરિફાઈ અને એપ્રુવલના નામે 800 રૂપિયાની લાંચ લેતા પકડી પાડી છે. સ્વાતિબેને ફરિયાદી પાસે લાંચની રકમ ક્યુઆર કોડ દ્વારા ટ્રાન્સફર કરાવી હતી. ACBએ તેને લાંચ લેતા રંગે હાથે ઝડપી પાડી હતી. આ ઉપરાંત અરવલ્લીના મેઘરજમાં પ્રધાનમંત્રી આવાસ યોજનાના મકાનના હપ્તા માટે કમિશન માંગનાર આઉટસોર્સ કર્મી નરેશ પટેલ અને ગ્રામસેવકને 52 હજારની લાંચ લેતા રંગેહાથે ઝડપી લીધા હતાં.
11 અને 12 ઓક્ટોબરે પોલીસ વિભાગના બે કર્મચારી પકડાયા
ગઈકાલે 12મી ઓક્ટોબરે નડિયાદમાં SCST સેલના ASI જયદીપ સોઢાને 4 લાખની લાંચ લેતા ગાંધીનગર ACBએ રંગેહાથે ઝડપી લીધા હતાં. તેમણે આરોપીને જેલમાં નહીં મોકલવા લાંચની માગ કરી હતી અને કારમાં જ ફરિયાદી પાસેથી ચાર લાખ રૂપિયા લેતા એસીબીએ તેમને રંગેહાથે ઝડપી પાડ્યા હતાં. 11 ઓક્ટોબરે નવસારીમાં એક પોલીસ કોન્સ્ટેબલ એક લાખની લાંચ લેતા ઝડપાયો હતો. ખેરગામ પોલીસ સ્ટેશનના કોન્સ્ટેબલે દારૂના ગુનામાં માર નહીં મારવા એક લાખ રૂપિયાની લાંચ માગી હતી. જેને એસીબીએ છટકુ ગોઠવીને લાંચ લેતા રંગેહાથે ઝડપી પાડ્યો હતો. ખેરગામ પોલીસ સ્ટેશનના સર્વેલન્સ સ્ક્વોર્ડના કોન્સ્ટેબલ દિવ્યેશ પટેલની લાંચના ગુનામાં ધરપકડ કરાઈ હતી.
