Gujarat News: સ્વયં હેતુ માટે કરાતી PIL મુદ્દે હાઈકોર્ટની લાલ આંખ, વડોદરાના સામાજિક કાર્યકરને 40 લાખનો દંડ ફટકાર્યો

ગુજરાત હાઈકોર્ટમાં સ્વયં હેતુ માટે કરાતી PIL મુદ્દે હાઈકોર્ટે નારાજગી વ્યક્ત કરી હતી. કોર્ટે વડોદરાના એક સામાજિક કાર્યકરને 40 લાખનો દંડ ફટકાર્યો છે. આ કાર્યકરે વડોદરામાં ટીપી સ્કીમમાં ગેરરીતિ મુદ્દે પીઆઈએલ કરી હતી. તેમણે અમલીકરણમાં ગેરરીતિ થઈ હોવાનો આક્ષેપ કર્યો હતો. આ પીઆઈએલની સુનાવણીમાં હાઈકોર્ટ ખફા થઈ હતી અને અરજદારને કોર્ટનો સમય બરબાદ કરવા મુદ્દે દંડ ફટકાર્યો હતો.

4 મહિનામાં 40 લાખ જમા કરાવવા આદેશ

પ્રાપ્ત વિગતો પ્રમાણે ગુજરાત હાઈકોર્ટમાં વડોદરાના એક સામાજિક કાર્યકરે શહેરમાં ટીપી સ્કીમોમાં ગેરરીતિ થઈ હોવા મુદ્દે અરજી દાખલ કરી હતી. આ અરજીમાં ટીપી સ્કીમોના અમલીકરણમાં ગેરરીતિ થઈ હોવાનો આક્ષેપ કર્યો હતો. આ અરજીની સુનાવણી દરમિયાન કોર્ટે અરજદાર કોર્ટનો સમય બરબાદ કરે છે તેમ કહીને નારાજગી વ્યક્ત કરી હતી. ત્યાર બાદ અરજદારને 40 લાખનો દંડ ફટકાર્યો હતો. ચાર મહિનામાં 40 લાખ રૂપિયા જમા કરાવવા કોર્ટે આદેશ કર્યો હતો. દંડની રકમ સ્ટેટ લીગલ સર્વિસમાં મોકલવામાં આવશે.

સમય બરબાદ કરતા અરજદારો સામે કોર્ટે લાલ આંખ કરી

હાઈકોર્ટમાં વારંવાર અરજીઓ કરીને કોર્ટનો સમય બરબાદ કરતા અરજદારો સામે કોર્ટે લાલ આંખ કરી હતી. પોતાના હેતુ માટે અરજી કરનારા અરજદારો સામે હવે કોર્ટે આકરૂ વલણ અપનાવ્યું છે. વડોદરાના અરજદારને લાખો રૂપિયાનો દંડ કરતાં સોંપો પડી ગયો છે. હાઈકોર્ટે કોર્ટનો સમય બરબાદ કરનારા અરજદારોને આ કાર્યવાહી રૂપે ચેતવણી પણ આપી છે.