Ahmedabad: ટોઈલેટમાં બેસીને હાઈકોર્ટની સુનાવણીમાં હાજરી આપનારને એક લાખનો દંડ

ગુજરાત હાઈકોર્ટમાં એક કેસની ઓનલાઈન સુનાવણી દરમિયાન શૌચાલયમાંથી જોડાનાર અબ્દુલ સમદ વિરુદ્ધ કોર્ટ દ્વારા હાથ ધરાયેલી અદાલતી તિરસ્કાર અંગેની કન્ટેમ્પ્ટ પ્રોસિડીંગ્સમાં જસ્ટીસ એ એસ સુપહીયા અને જસ્ટીસ આર.ટી. વાચ્છાણીની ખંડપીઠે કસુરવાર યુવક અબ્દુલ સમદને એક લાખ રૂપિયાનો દંડ ફટકાર્યો છે. હાઈકોર્ટે આ દંડની રકમ 22 જુલાઈ સુધીમાં હાઈકોર્ટ રજીસ્ટ્રીમાં જમા કરાવવા ફરમાન કર્યું છે.

લોગ ઈન થયેલા વ્યક્તિનો ક્લોઝ અપ દર્શાવાય છે

હાઈકોર્ટનો તિરસ્કાર કરનાર આ યુવકનો વીડિયો વાયરલ થયો હતો. તે ઘટના જસ્ટીસ નિર્ઝર એસ. દેસાઈની કોર્ટમાં બની હતી. વીડિયોની શરૂઆતમાં અબ્દુલ સમદ બેટરી તરીકે લોગ ઈન થયેલા વ્યક્તિનો ક્લોઝ અપ દર્શાવાય છે. તેણે ગળામાં બ્લુટૂથ ઈયરફોન પહેર્યા હતાં. તેનો ફોન થોડા અંતરે રાખેલો જોવા મળે છે અને તે શૌચાલયમાં બેઠેલો હોવાનું વીડિયોમાં જોવા મળે છે.

અબ્દુલ સમદે હાઇકોર્ટની બિનશરતી માફી માગી હતી

આ વ્યક્તિ પોતે ફરિયાદી હતો અને આરોપીની પીટીશન રદ કરવાની ક્વોશિંગ પીટીશનમાં તે પ્રતિવાદી ફરિયાદી તરીકે હાજર થયો હતો. જો.કે આ પ્રકારે શૌચાલયમાંથી ઓનલાઈન કોર્ટમાં હાજર થવાના તેના કૃત્યનો વીડિયો વાયરલ થતાં ગુજરાત હાઈકોર્ટે આખરે કસુરવાર યુવક સામે સુઓમોટો કન્ટેમ્પ્ટ પ્રોસિડીંગ્સ હાથ ધરીને રજીસ્ટ્રી પાસેથી આ સમગ્ર મામલે રીપોર્ટ મંગાવ્યો હતો. ગરીબ હોવાથી કોર્ટના ધજાગરા ઉડાવી ન શકાય તેવું કોર્ટે અવલોકન કર્યું હતું. જ્યારે અબ્દુલ સમદે હાઇકોર્ટની બિનશરતી માફી માગી હતી.