અષાઢી બીજના પર્વે યોજાનારી અમદાવાદની જગપ્રસિદ્ધ ભગવાન જગન્નાથજીની રથયાત્રાને હવે ગણતરીના દિવસો જ બાકી રહ્યા છે, ત્યારે શાંતિપૂર્ણ વાતાવરણમાં આ ભવ્ય મહોત્સવ સંપન્ન થાય તે માટે પોલીસ અને વહીવટી તંત્ર અત્યારથી જ એક્શન મોડમાં આવી ગયું છે. રથયાત્રા પૂર્વે કાયદો અને વ્યવસ્થાની સ્થિતિ સુદ્રઢ રાખવા તેમજ કોઈ અપ્રિય ઘટના ન ઘટે તે હેતુથી પોલીસ દ્વારા કડક સુરક્ષા કાર્યવાહી હાથ ધરવામાં આવી રહી છે. રથયાત્રાના રૂટ અને સંવેદનશીલ વિસ્તારો પર વિશેષ નજર રાખવા માટે એક્શન પ્લાન તૈયાર કરી દેવાયો છે.
ક્રાઈમ બ્રાન્ચે શરૂ કર્યું ડ્રોન સર્વેલેન્સ
આ કડક સુરક્ષા વ્યવસ્થાના ભાગરૂપે અમદાવાદ ક્રાઈમ બ્રાન્ચની ખાસ ટીમ દ્વારા જમાલપુર સ્થિત ઐતિહાસિક જગન્નાથ મંદિર અને તેની આસપાસના સમગ્ર વિસ્તારોમાં અત્યાધુનિક ડ્રોન કેમેરાની મદદથી હાઈટેક સર્વેલેન્સ (નિરીક્ષણ) શરૂ કરી દેવામાં આવ્યું છે. આકાશમાંથી ડ્રોન ફ્લાય કરાવીને મંદિરની આસપાસ આવેલા રહેણાંક મકાનો, ધાબા, ઊંચી બિલ્ડિંગો અને ધાબા પર એકત્રિત કરાયેલા સામાનની બારીકાઈથી તપાસ કરવામાં આવી રહી છે. ટેકનોલોજીના આ ડિજિટલ માધ્યમથી સમગ્ર પરિસરની સુરક્ષા સ્થિતિની સમીક્ષા લાઈવ ફીડ દ્વારા કરવામાં આવી રહી છે.
