Ahmedabadમાં ઇન્કમટેક્સ બ્રિજની રિપેરિંગની કામગીરી શરૂ, ટ્રાફિકને કોઈ અડચણ ન થાય તે માટે AMCએ રાખ્યું ખાસ ધ્યાન

અમદાવાદ મ્યુનિસિપલ કોર્પોરેશન (AMC) દ્વારા શહેરના મુખ્ય માર્ગો પૈકીના એક એવા ઇન્કમટેક્સ બ્રિજ પર રિપેરિંગની કામગીરી શરૂ કરવામાં આવી છે. આ કામગીરી ખાસ કરીને બ્રિજના સ્પાન જોઈન્ટના બેરિંગના સમારકામ માટે હાથ ધરવામાં આવી છે. આ રિપેરિંગ કાર્ય દરમિયાન ટ્રાફિકને કોઈ અડચણ ન થાય તે માટે ખાસ ધ્યાન રાખવામાં આવ્યું છે. આ કામગીરી ચાલુ ટ્રાફિકમાં જ તબક્કાવાર રીતે કરવામાં આવી રહી છે. જેથી વાહનચાલકોને કોઈ મુશ્કેલી ન પડે.

અમદાવાદ મ્યુનિસિપલ કોર્પોરેશને શરૂ કરી કામગીરી

બ્રિજ નીચે સપોર્ટ મૂકીને બેરિંગનું રિપેરિંગ થઈ રહ્યું છે. આ કામગીરી શરૂ કરવાનો મુખ્ય નિર્ણય તાજેતરમાં બનેલી ગંભીરા બ્રિજ દુર્ઘટના બાદ લેવામાં આવ્યો હતો. તે ઘટના પછી અમદાવાદ મ્યુનિસિપલ કોર્પોરેશને શહેરની સાબરમતી નદી પરના તમામ બ્રિજનું સર્વેક્ષણ કરાવ્યું હતું. સર્વે દરમિયાન ઇન્કમટેક્સ બ્રિજના સ્પાન બેરિંગમાં રિપેરિંગની જરૂરિયાત જણાતા તંત્ર દ્વારા આ કામગીરી તાત્કાલિક શરૂ કરવામાં આવી છે.

ટ્રાફિકને અડચણ ન થાય તેના માટે મુકાયો સપોર્ટ

બ્રિજનું સમારકામ પૂર્ણ થયા બાદ બ્રિજની મજબૂતી અને સુરક્ષામાં વધારો થશે. જેનાથી વાહનચાલકો સુરક્ષિત રીતે મુસાફરી કરી શકશે. AMC દ્વારા શહેરના માળખાકીય સુવિધાઓની જાળવણી અને સુરક્ષાને પ્રાધાન્ય આપવામાં આવી રહ્યું છે. આ રિપેરિંગ કામગીરી બ્રિજની ટકાઉપણું વધારશે અને ભવિષ્યમાં કોઈ સંભવિત દુર્ઘટનાને ટાળવામાં મદદરૂપ થશે. હાલમાં આ કામગીરીનું સતત મોનિટરિંગ કરવામાં આવી રહ્યું છે જેથી આ કામગીરી નિર્ધારિત સમયમાં પૂર્ણ થઈ શકે.