ગુજરાત સહિત દેશના 12 રાજ્યોમાં ચૂંટણી પંચ દ્વારા 'સ્પેશિયલ ઇન્ટેન્સિવ રિવિઝન (SIR)' પ્રક્રિયા શરૂ કરવામાં આવી છે, જેના ભાગરૂપે અમદાવાદ જિલ્લામાં પણ સઘન ઝુંબેશનો પ્રારંભ થયો છે. મતદાર યાદીને સંપૂર્ણપણે ભૂલરહિત બનાવવા અને નવા યુવા મતદારોના નામ ઉમેરવાના મુખ્ય ઉદ્દેશ્ય સાથે આ કામગીરી શરૂ કરાઈ છે. અમદાવાદ જિલ્લાના કુલ 62.59 લાખ મતદારોને આ ઝુંબેશ હેઠળ એન્યુમરેશન ફોર્મનું વિતરણ કરવામાં આવશે. આ પ્રક્રિયા માટે જિલ્લામાં 5.5 હજાર (5,500)થી વધુ BLO (બૂથ લેવલ ઓફિસર્સ)ને મહત્ત્વની જવાબદારી સોંપવામાં આવી છે. BLO દ્વારા સોસાયટીઓ અને રહેણાંક વિસ્તારોમાં ઘરે-ઘરે જઈને મતદારોને ફોર્મ વિતરણ કરવામાં આવી રહ્યા છે, જેથી મતદારો સરળતાથી પોતાનું નામ ઉમેરી કે સુધારી શકે.
BLO દ્વારા ઘરે-ઘરે ફોર્મ વિતરણ અને ખાસ સુવિધાઓ
BLO દ્વારા સોસાયટીઓમાં ડોર-ટુ-ડોર જઈને ફોર્મ 6, 7, અને 8 નું વિતરણ કરવામાં આવી રહ્યું છે. આ ઝુંબેશ આગામી 4 ડિસેમ્બર 2025 સુધી ચાલશે. આ સુધારણા પ્રક્રિયામાં મહિલાઓ, અશક્ત નાગરિકો, દિવ્યાંગો અને વડીલોને કોઈ અગવડ ન પડે તે માટે ખાસ વ્યવસ્થા કરવામાં આવી છે. તેમને મદદ કરવા અને ફોર્મ ભરવામાં સહાય કરવા માટે સ્વયંસેવકોની નિયુક્તિ કરવામાં આવી છે. આ સ્વયંસેવકો સુનિશ્ચિત કરશે કે સમાજના તમામ વર્ગોના નાગરિકો મતદાર યાદી સુધારણાની આ પ્રક્રિયામાં સક્રિયપણે ભાગ લઈ શકે અને તેમની વિગતો અપડેટ કરાવી શકે.
